25-февралдиз Каспийскда, Къ.Къурамегьамедован тIварунихъ галай спортдин залда, азаддаказ кьуршахар кьунай жаванрин арада республикадин турнир башламишдалди вилик чи ватанэгьли, вичин ери-бине Белиждай тир, Каспийскда (алай вахтунда ам вични и шегьерда яшамиш жезва) кьиле фейи Дагъустандин чемпионатда буьруьнждин медаль къазанмишай Рустам Къарахановаз, адан агалкьунар къейд авун яз, дуьньядин, Европадин 5 сеферда чемпион Къурамегьамед Къурамегьамедова пулдин пишкеш гана.
Дугъриданни, агалкьунар Рустам Къарахановахъ тIимил авач. Ам, республикадин хьиз, Вирироссиядин ва международный хейлин турниррин гъалибчи ва призер я. Кьилди къачуртIа, ада Москвадин чемпионатра (2020, 2019-йисар), Москвадин Кубок патал акъажунра (2016 ва 2017-йисар), Москвадин студентрин, континентрин спортсменрин арада Кубок патал акъажунра (Хасавюрт, 2019-йис), Россиядин кIвенкIвечивал патал акъажунра ва Европадин чемпионатда (2011-йис) гъалибвилин ва приздин чкаяр кьуна.
Рагнеда Рамалданова
