5-июндиз, Москвадин Яру майдандал кьиле фейи ктабрин фестивалдин сергьятра аваз, эдебиятдин гъвечIи жуьрейрин ва афоризмайрин авторрин «Сократ» кIватIалдин председатель Сергей Сидорова Вирироссиядин эдебиятдин «Йисан афорист» (2026-йисан) премиядиз талукь презентация кьиле тухвана.
Малум хьайивал, махсус премия къачуз жедай мумкинвал авайбурун финалдин сиягьда авай ругудакай сад лезги афорист Гьарун Агацарский я.
Гь. Агацарскийдин камаллу, итижлу келимаяр чна хайи чIалал «Лезги газетдани» идалай вилик са шумудра чапнай. Къейд ийин, алатай йисара ам афоризмайриз талукь махсус конкурсра са шумудра гъалиб хьана, хъсан чкаяр кьуна. Интернетдин майданра адан келимаяр (ада асул гьисабдай урус чIалал кхьизва) гзафбуру ишлемишзава.
Москвадин афористикадин клубдин член, «Акьулдин гапур» ктабдин автор Гь. Агацарский Махачкъалада яшамиш жезва, ам Докъузпара райондин Мискискарин хуьряй я.
Гъалибчийриз шад гьалара шабагьар гунин мярекат 11-декабрдиз Москвадин ЦДРИ-да (центральный дом работников искусств) кьиле фида. Чна хци кьатIунар авай ватанэгьли гъалиб хьуник умуд кутазва.
Автордин цIийи келимаяр чна «Лезги газетдин» къведай нумрада чапда.
К. Ферзалиев
