50 йисалай
Школа куьтягьунин 50 йисан юбилей. Асирдин са паюна вакъиаярни крар гзаф хьанва. 11 йисуз санал кIелайбурун гуьруьш. Адет яз, ам хъсан гьазурвал акуна, тешкиллувилелди къейдзава.
2026-йисан 29-июнь Ахцегьрин СтIал Сулейманан тIварунихъ галай 1-нумрадин юкьван школадин – гила аграрный колледждин гьаятда 1976-йисан выпускникрин вири санал 4 классдин (а макъамда гьар са классда 30-дав агакьна аялар авай) 49 кас, гила бадеярни чIехи бубаяр кIватI хьана. Абур Огни шегьердин ГБПОУ «Аграрный колледждин» Ахцегьрин филиалдин заведующий Земфира Муспагьовади хушдиз къаршиламишна. Бязибуруз школа куьтягьайдалай кьулухъ садаз-сад ахкунвачир. Абур къужахра гьатзавай, школадин гьаятдани багъда, классрани дегьлизра къекъвез, шикилар язавай…
Гуьруьш виликан 10 «а» классдин ученица, Каспийск шегьердин 7-нумрадин гимназияда тарсар гузвай РД-дин лайихлу муаллим Эльмира Генжалиевади кьил кутуналди арадиз атай тешкиллувилин комитетди (адак Рамазанова Гьабибат, Велиев Рамазан, Кълинжев Халид, Пирсаидов Кьасум квай) гьазурна. Мад са кьетIенвал ам хьана хьи, мярекат Ахцегьрин машгьур школадин – Дагъустанда хуьруьн чкада светский сифте школадин – 165 йисан юбилейдал ацалтнава.
КIватI хьанвайбур, баркаллу ахцегьви карчи, ватанпересвилин «Женгинин стхавал» тешкилатдин Ахцегь райондин хилен председатель Руслан Сулейманова и мярекатдиз талукь яз ИИ-дин куьмекдалди туькIуьрай махсус манияр япара аваз, сифте са чIехи классда ацукьна...
– Гьуьрметлу стхаяр, вахар, пара кIани муаллимар! – башламишна Эльмира Шиховнади. – И школа куьтягьна, чIехи уьмуьрдиз кам вегьейдалай кьулухъ дуьз 50 йис алатнава. Амма акI я хьи, гуя чун накь ина авай къайгъусуз, женжел аялар я. Кьисметди гьар сад саниз акъудна, парабур къуллугърин еке дережайривни агакьна. Къе чун мад санал ала. Агалкьунрал дамахзава. Гьайиф хьи, бязибурувай къе чи гуьруьшда иштиракиз жезвач. Бязи муаллимар ва санал кIелай дустар чи арада амач. Аллагьди рагьметрай чпиз! Къе чна чи выпускдин неинки 50 йис къейдзава, гьакI гьар сада, хизандин кьил, хтулрин баде, чIехи буба яз, вичин хсуси тарихдин, уьмуьрдин сифте паюнин нетижаяр кьазва. Къуй чи агалкьунар, арада авай гьуьрмет яргъалди давам хьурай!
50 йисалай давам хьайи ачух тарс зегьметдин ветеранар тир яшлу муаллимри – Агьмедова Насият Шихмегьамедовнади, Сулейманова Мильенат Султалиевнади, Ханагьмедова Саният Исмаиловнади ва Касаров Руслан Эфендиевича тухвана. КьетIенди тир и тарс, рагьметдиз фенвай юлдашар рикIел хкуналди, са декьикьада кисна акъвазунилай башламишна. Ахпа хуш суьгьбетарна. Бязибур чпин уьмуьрдин агалкьунрикай рахана.
Выпускной бязи классрин сифте муаллимринни классрин руководителрин тIварар кьан: 1976-йисан 10 «а» класс – Мирзоева Мария Дмитриевна; «б» класс – Ибрагьимова Насият Шихмегьамедовна, Насиров Жавид Селимович; «в» класс – Гьашумова Гуьльдерей Абдулгъафаровна, Халикьова Вера Архиповна; «г» класс – Вагьабов Загьир Абдукъадирович, Парпачев Ибрагьим Шарафович. Бязи муаллимар: Аливердиев Аливерди (директор), Мамедов Мамед, Мирзоев Нияз, Жафаров Бейбала, Гьемзабегов Мегьамед, Касимов Селим, Асваров Сафидин, Абдуллаев Мурад, Шефиева Евгения, Ханагьмедова Людмила, Абдулкеримова Изумруд ва масабур.
Шад мярекатдин кьвед лагьай пай Ахцегьрин «Самур» комплексдин гуьзел ресторанда давам хьана. Экуь гуьзел залди, ашпазринни официантрин селигъалу къуллугъри, руьгь тухардай милли манийринни макьамри ва гьуьрметдин келимайрини чими суьгьбетри 1976-йисан выпускникриз къулайдиз ял ягъун таъминарна. Гуьгьуьлар чпин манийралди РД-дин культурадин лайихлу къуллугъчи Таира Муспагьовадини бажарагълу музыкант, манидар Сефихан Сефиханова мадни цицIи ийизвай. Мярекатдин сифте пай Эльмира Генжалиевадини Гьабибат Рамазановади кьиле тухванатIа, кьвед лагьай паюнин тамадавал Герейхан Мисриханова авуна. Вири рази яз амукьна.
Дашдемир Шерифалиев,
Ахцегьрин 1-нумрадин СОШ-дин 1976-йисан выпускник,
журналист, РД-дин культурадин лайихлу къуллугъчи