Призыв – 2026

«Дагъустан» РИА-дин майдандал республикадин военный комиссар, полковник Мурадханов Абдурагьманан ва призывдин отделдин начальник, подполковник Омаргьажиев Гьуьсейнан брифинг кьиле фена.

А. Мурадханова лагьайвал, призывдиз талукь цIийивал ава: цIинин йисалай йисан вири вахтунда (1-январдилай 31-декабр­далди) призывдиз талукь серенжемар тешкилда, амма Россиядин армиядиз агьалияр кьве сеферда тухуда. Гатфарин призыв 1-апрелдилай 15-июндалди кьиле фида.

– 2025-йисан зулун призыв­дин планар чна вахтунда кьилиз акъудна, – къейдна полков­никди. – Гьелбетда, вири рай­он­ра призывдин кIвалах хъсандиз­ тешкилнавачир. Амма­ Тару­мов­ский, Ногъай, Хунзах, Табасаран, Бабаюрт, Лак, Шамиль­ районрин, Махачкъала, Дер­бент, Да­гъустандин Огни, Юж­но-Су­хо­кумск шегьеррин ко­мис­сариат­ри чпин везифаяр чешнелудаказ тамамарна.

Гатфариз Дагъустандай Рос­сиядин армиядиз 3000 жегьил тухудайвал я. Аскервилин партал алукIдай гадайри кьуд вацра махсус курсара кIелда, военный пешеяр къачуда. Ахпа абур тайин тир частариз рекье твада.

Дяведин махсус серенжемдиз гуьгьуьллувилелди фенвай, ана ругуд вацра иштиракай жегьилар призывдикай азадзава.

Армиядин жергейриз фидай­ яш тамам хьанвай ва повестка вугайдалай гуьгъуьниз къад йикъалди военкоматдиз татайди хьайитIа, ам жавабдарвилиз чIугвада. Жегьилрин сад ла­­гьай десте армиядиз 7-апрелдиз рекье твада.

Призывдикай чириз кIанза­вай месэлаяр аватIа, Дагъус­тандин военкоматдин «ифей ли­ния­дин» телефондин 8 872 263 88 86 нумрадиз зенг ийиз жеда.

Абад Азадов