Агьалийрин гьал-агьвал, яшайишдин шартIар авайдалай хъсанарунин, къулайвилер яратмишунин мураддалди, Сулейман-Стальский райондин руководстводи са шумуд проект кардик кутунва. Абурун бинедаллаз хейлин хийирлу кIвалахар кьилиз акъуднава ва и кIвалах давамни жезва.
Кьилди къачуртIа, Кьасумхуьрел михьивилер авунин, целди таъминарунин, экологиядин истемишунриз талукь кIвалахар авунва. ЦIийихуьруьн куьчейра къир цанва, бязибур ремонтнава. Сийидрин хуьруьн юкьвай фенвай шегьредин къерехар михьнава, саки 2 км-диз кьван тротуар тухванва. И карда хуьруьнвийрини активнидаказ иштиракна. Мадни къейд авуниз кутугнавай кар ам я хьи, “Зи чин — зи хуьр” программадин сергьятра аваз “Лап хъсан хуьр, куьче, магьле, кIвал” тIвар алаз конкурсни кьиле физва. Адан сергьятра аваз хуьрерин куьчеяр, кIвалерин гьаятар, цуьквер цана, безетмишунин, аваданламишунин кIвалахар авунва. Хейлин ксарин гьаятра туькIуьрнавай газонрикай, яргъалди тазаз амукьдай цуькверин аллеяйрикай инсанри тарифдин гафар лугьузва. Ахьтинбур ЦIийихуьре, Герейханован хуьре, Агъа СтIалдал ва анин Къазмайрал ала. Кьасумхуьруьн центрадал алай “Фан-Су” тIвар алай мехъерринни межлисрин гуьрчег залдин иеси Оружев Владимирни и конкурсдик экечIнава. Сифте нубатда ада дараматдин къене-къеце патар гуьрчегдиз аваданламишнава.
Ина дараматдин вилик са жергеда агъадай виниз елкадин тазар акIурнава, гьар жуьредин гуьрчег цуькверни цанва. Цлан кIане гьамиша серин я, анрални цуьквер цанвай еке чанар эцигнава, патарив ацукьдай куьсруьярни гва. И йикъара дараматдин вилик патан дакIаррин кьве патайни фонтанар эцигна, кардик кутунва. Абурулай са кьве метрдин анихъ хьиз инсанар акъваздай, цлар, къав цуькверивди безетмишнавай гуьрчег чкани туькIуьрнава. И къулайвилерикай инсанри менфят къачузва. Ина мад са цIийивал хьанва. КIвалахрал алайбуруз, паталай атайбуруз къулай хьун патал, кьилдин столовойни кардик кутунва. Ана гьар жуьре дадлу хуьрекарни жезва, къиметарни багьа туш. Вири и крарилай инсанри разивалзава, Владимираз чухсагъул ва конкурсдани хъсан нетижаяр хьана кIанзавайди лугьузва.
Конкурс давам жезва, адан метлебни хуьр-кIвал аваданламишун, хуьрерал абур гъун я. Адан сергьятра аваз сардархуьруьнвийрини са жерге хийирлу крар авунва. Исятда абуру ясли-бахчадин къаншарда, шегьредин эрчIи къерехтирвал, мектебдихъди тротуар тухузва. Адахъ вижеваз гьяркьуьвални ава, яргъивални. Са кьадар чкадиз тухванва. Гьа икI, райондин кьилин тапшуругъ кьилиз акъудзава.
Райсудин Набиев
