Акьалтзавай несилдиз ватанпересвилин тербия гунин карда РФ-дин Президент Владимир Путина 2015-йисан 29-октябрдиз “Россиядин школьникрин гьерекат” тIвар алаз Вирироссиядин аялринни жаванрин общественно-государственный организация тешкилунин гькъиндай Указ акъуднай.
Россиядин оборонадин министр Сергей Шойгудин теклифдалди 2016-йисан 1-сентябрдилай кардик кутур “Жегьилрин армияни” (“Юнармия”) винидихъ тIвар кьунвай тешкилатдин са хел я. “Юнармиядин” отделенияр Россиядин вири регионра тешкилнава, штаб-квартира Москвада ава.
Алатай гьафтеда Мегьарамдхуьруьн райондин Россиядин халкьарин адетдин, культурадин Центрада райондин “Жегьилрин армиядин” сифте слет кьиле фена.
Мярекатда райондин кьил Фарид Агьмедова, военный комиссар Эльман Гьажиева, общественный ватанпересвилин тешкилатдин штабдин начальник Эдуард Рагьимханова, дяведин, РФ-дин Яракьлу Къуватрин ветеранри, администрациядин, УО-дин жавабдар къуллугъчийри, жегьилрин векилри, идарайрин руководителри иштиракна.
Мярекат РФ-дин Гимн ягъунилай башламиш хьана. Слетда иштиракзавай райондин школайра тешкилнавай “Юнармиядин” отрядри, дявединни спортдин къугъунрин гъалибчийри Ватандиз кьегьалвилелди, вафалувилелди къуллугъда, баркаллувилин адетрин тежриба артухарда лагьана кьин кьуна.
Фарид Агьмедова мярекатда кIватI хьанвай жегьилар “Юнармиядин” тешкилатдиз кьабулун мубаракна ва чи уьлкведин, халкьдин гележег патал и гьерекат тешкилунихъ чIехи метлеб авайди, уьлкведин, республикадин руководстводи акьалтзавай не-силдиз аскервилинни ватанпересвилин тербия гузвай “Жегьилрин армиядин” тешкилатдиз еке фикир гузвайди къейдна.
Ф.Агьмедова жегьилриз уьмуьрдин вири хилера сифте чкайрал хьуниз чалишмишвал авуниз, бажарагълу, лайихлу инсанар хьуниз эвер гана ва “Юнармиядин” гьерекатдиз кьабулайбурув ВВПД-дин отделенидин шагьадатнамаяр вахкана.
Эьлман Гьажиева “Юнармиядин” жегьилриз и важиблу вакъиа мубаракна ва райондихъ школьникриз, жегьилриз аскервилинни ватанпересвилин тербия гунин жигьетдай хъсан тежриба авайди ва и кардиз райондин руководстводи еке фикир гузвайди къейдна.
Жегьилриз тебрикдин ва насигьатдин келимаяр райондин Афгъанвийрин советдин член Эмирагъа Асварова лагьана.
Мярекат школада кIелзавайбуру манияр ягъуналди давам хьана. Гуьгъуьнлай дявединни спортдин “Гъалибвал” къугъунин гъалибчийри ва Мегьарамдхуьруьн 1-нумрадин мектебдин ученикри Калашникован автомат кIватIунин ва чукIурунин конкурсда иштиракна.
Земфира Бабаева
