Жавабдарвал хкажун патал

8-июлдиз Дагъустандин государстводин халкьдин майишатдин университетда РД-дин Гьукуматдин Председателдин сад лагьай заместитель Рамазан Алиев кьиле аваз республикада проектрин кIвалах цIийикIа тешкилуниз талукь месэладай семинар-совещание кьиле фена. Мярекатда РД-дин Кьилин адмнистрациядин ва Гьукуматдин информациядин политикадин рекьяй Управленидин начальник Т.Чиненнаяди, печатдин ва информациядин министр Рашид Акавова, ДГУНХ-дин президент, профессор Гьамид Бучаева, университетдин бинедаллаз тешкилнавай управленидин, экономикадин ва социологиядин НИИ-дин директор, профессор Салигьбег Абдулманапова, гьакIни шегьеррин ва районрин муниципалитетрин кьилери иштиракна.
Семинардин кIвалах башламишдайла Рамазан Алиева къейд авурвал, проектрин кIвалах вилик квай асул месэлайрай виле акьадай нетижайрив агакьарун, чи республикадин агьалийриз яшайишдин къулай шартIар тешкилун патал асул мумкинвал я.
“Проектрал бинеламиш хьана идара авунин цIийи формат — им кIвалах тешкилунин цIийи къайда я, адан бинеда и ва я маса месэлаяр авайдалай дериндай ва мукьуфдивди гъиле кьун ава. И къайдади кар алай проектар уьмуьрдиз куьчуьрмишунин карда неинки РД-дин Гьукуматдин председателрин заместителрин, министерствойринни ведомствойрин, муниципалитетрин кьилерин, гьакIни проектар кьилиз акъудунал машгъул кьилдин ксарин жавабдарвал артухардай мумкинвал гузва. Чна и форматда аваз кIвалахиз тахминан зур йис хьанва. Къенин юкъуз республикада кар алай 7 проект уьмуьрдиз куьчуьрмишзава, абурун сергьятра аваз гьакIни 52 подпроектдин винел кIвалахзава. Проектар кьилиз акъудун патал кIвалах активнидаказ кьиле тухузва, и кардин гъавурда гьатзава, нетижаярни арадал къвезва. Чна алукьзавай йис патални проектрин винел кIвалах кьиле тухузва, чи проектар алукьзавай йисан бюджетда тайин макьсаддихъ туькIуьрнавайбур яз къейд ийидайвал”, — малумарна ада.
Гьамид Бучаева къейд авурвал, къенин юкъуз университет кар алай проектар уьмуьрдиз куьчуьрмишунин карда вири идарайрихъ ва муниципалитетрихъ галаз санал кIвалахиз, куьмекар гуз гьазур я.
“Проектрин офис чи вуздани ава ва ам Дагъустанда виридалайни нетижалубурукай сад я. Чун куь къуллугъчийриз кIвалах тешкилдайвал чирун патал чи пешекарар куь ихтиярда вугуз, абур районриз ва министерствойриз рекье тваз гьазур я. Чаз куьмек гуз кIанзава, чи тежрибадикай квезни менфят жедайвал”, — лагьана Гь.Бучаева.
Рашид Акавова кIватI хьанвайбуруз республикада проектрин кIвалах СМИ-рин куьмекдалди гьикI ачухарзаватIа, гьадакай лагьана. ИкI, ада хабар гайивал, алай йисан 6 вацран вахтунда республикадин газетра ва “Дагъустан” РИА-дин сайтда РД-да кар алай проектар кьилиз акъудунин кIвалахдикай тир 200 макъаладиз чка ганва. Гьа са вахтунда “Дагъустан” РГВК-ди 700 видеоматериал (хабарар, программаяр, передачаяр) гьазурнава.
Гуьруьшдин эхирдай Рамазан Алиева къейд авурвал, проектрал бинеламиш хьана идара ийидай къайда алай вахтунда вири уьлкведин майданда гъиле кьазва.

Чи корр.