Махачкъалада, Шииратдин театрда республикадин Кьили теклифнавай “Дагъустандин халкьарин шииратдин, манийрин, театрдин культурадин гьафте” проектдин нубатдин, лезгийриз талукь паюни вичин кIвалах башламишнава.
22-майдиз ам яратмишунрал машгъул ксар, студентар, вузринни школайрин муаллимар тебрикуналди Дагъустандин писателрин Союздин лезги писателрин секциядин регьбер, Дагъустандин халкьдин писатель Абдуселим Исмаилова ачухна.
Ам алай вахтунда яратмишунрал машгъул ксарал гьалтзавай четинвилерикай, майдандиз экъечIзавай жегьилар лап тIимил хьуникай рахана.
Лезги эдебиятдин тарихдиз Даггосуниверситетдин муаллим-агъсакъал, профессор Гьажи Гашарова сейрна. Ада, IХ асирдин лезги эдебиятдилай башламишна къе теснифзавай жегьилрикай, абурун яратмишунрикай къешенг ва маналу суьгьбетна. Алим гьялиз тахьанвай месэлайрални акъвазна. Кьилди къачуртIа, филологиядин факультетра лезги чIал чирзавай студентрин кьадар, иллаки хъсандиз кIелзавай ва яратмишзавайбур къвердавай тIимил хьуникай ада гьайиф чIугуналди лагьана. Залда ацукьнавай вичин виликан студентар, къе машгьур писателарни шаирар, журналистар жегьилриз чешне гъана.
Алай вахтуна Дагъустандин ктабрин издательстводин кIвалахдикай, и мукьвара ана акъатнавай лезги зарийрин ктабрикай, абурун тиражрикай Дагъустандин халкьдин шаир Арбен Къардаш рахана ва вичин са шумуд шиир кIелна.
Алай девирда лезги журналистика ва гьакI хайи чIал, литература авай гьалдикай “Лезги газетдин” кьилин редактор Мегьамед Ибрагьимова ва литературадин отделдин редактор Мердали Жалилова суьгьбетна. М.Жалилова жегьил шаирриз яратмишунриз талукь тарс гана, рикIиз таъсирдай эсерар арадал атуникай хейлин мисалар гъана.
Мярекатдал чпин алакьунар школьникрини къалурна, меркездин 38 ва 28 лагьай школайра кIелзавай са шумуд аялди гьевесдивди шиирар кIелна.
Мярекат итижлуди, девирди истемишзавайди хьана. Ина чпин цIийи эсерар кIелай шаирарни, цIийи танишар хьайи студентарни авай. Къейд ийин, Лезги шииратдин, манийрин, театрдин культурадин гьафтедин сергьятра аваз 25-майдиз Лезгийрин СтIал Сулейманан тIварунихъ галай госмуздрамтеатрди “Айисат” тамаша къалурда ва 26-майдиз РД-дин композиторрин ва лезги шаиррин эсерар-манияр тамамарзавай манидаррин иштираквал аваз музыкадинни шииратдин вечер кьиле фида.
Дагъви Шериф
