6-октябрдиз Дербент шегьердин “Лейла” тlвар алай залда Яшлубурун югъ къейдна. Зал гуьрчегдиз туькlуьрнавай ва ана суфраярни ачухнавай.        Мярекатдиз уьлкведин, республикадин ва хайи шегьердин абадвал хкажун патал баркаллу зегьметдалди чlехи агалкьунар къазанмишай ва, яшаризни килиг тавуна, гилани зегьмет чlугвазвай дербентвийриз теклифнавай.

Яшлу несилдиз сувар Дербент шегьердин кьил Малик Баглиева мубаракна:

— И югъ куь яшлувал рикlел хку­нин югъ туш, ам квез, чи бубай­ризни дидейриз, зегьметдинни дяведин ветеранриз, куь тежрибадиз, хъсанвилизни камаллувилиз чухсагъулдин чими гафар лугьудай югъ я. Зи гафариз къуват яз ихьтин мисал рикIел хкин:  Бубади хцивай хабар кьазва: “Вун ви­кlегь яни, зун?” Гадади гьасятда “зун” лагьана, жаваб гузва. Са тlи­мил анихъ фейила, гадади жаваб хгузва: — Вун, буба. — Бу­бади хабар кьазва: — Бес вучиз вуна сифте маса жаваб ганай? — Вучиз ла­гьай­тlа а вахтунда ви гъил зи къуьнел алай.

Анжах куьн патав гвайла, чна чун ви­кlегь­бур яз гьиссзава, квевди рахун, квевай камаллу­вилин тарсар къачун, чун паталди еке шадвал я, — алава хъувуна М.Баглиева.

Вичин рахунра шегьердин кьили Дербент йигин камаралди вилик физвайди, шегьер цlийи кьилелай арадал хквезвайди, ана еке дегишвилер жезвайди, гьеле гзаф крар хъувун герек тирди, шегьердин властди вири къуватар шегьерэгьлийрин агьваллувал хкажунихъ желбдайди къейдна.

РД-дин Гьукуматдин, зегьметдинни яшайишдин жигьетдай вилик финин министр Расул Ибрагьимован тlварцIихъай  шегьердин социальный хиляй управленидин начальник Людмила Терещенкодини кlватl хьанвайбуруз Яшлубурун югъ тебрикна.

Мярекатдал шегьердин школайра тухвай “Зи кlани чlехи бубани баде” сочиненийрай цlара­рихъ яб акална, шегьердин общественный палатадин председателдин заместитель Сейран Рагьимова конкурсдин гъалибчийрив  савкьатар вахкана.

И юкъуз шегьердин гьуьрметлу агьали Гьажи Жабраилова санал 50 йисуз яшамиш хьайи са жерге хизанрив  “Кlанивал ва вафалувал хуьнай” медалар вахкана. Дербент шегьердин офицеррин  союздин председатель Саид Агьмедова военный рекьяй къуллугъзавай офицеррин уьмуьрдин юлдашрив “Офицердин кайвани” медалар вахкана. Шабагьар вахкай виридаз ше­гьердин кьилин патай савкьатар гана.

Яшлубуруз чlехи концертдин программани гьазурнавай. Ана шегьердин аялрин ва идарайрин художественный самодеятельнострин коллективри иштиракна.

Мярекатдиз   къаюмвал   Малик Баглиева, “ДЗИВ” ОАО-ди, “ТЭФИ”­, чрадай шейэрин “Тале” ва “Восточная выпечка” фирмайри, “ТВ-Каспийди” ва шегьердин 1-нумрадин базарди авуна.

Къагьриман Ибрагьимов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя