Эхиримжи йисара Дагъустанда къушчивилин хел еримлу авуниз кьетIен фикир гузва. Республикадин кар алай “Нетижалу АПК” проектда ам агропромышленный комплексдин виридалайни важиблу хилерикай сад яз къейднава. И кардин себеб ам я хьи, регионди къушарин якIун жигьетдай хсуси игьтияжар анжах 30 процентдин тамамарзава.
И проект уьмуьрдиз куьчуьрмишунин, гьакIни къецепатан уьлквейрай гъизвай суьрсет ватанда гьасилзавайдалди эвезунин программадин сергьятра аваз, республикада са жерге серенжемар кьабулзава. Гележегда абуру къушчивилин хел са кьадардин виниз тир дережадиз акъуддай мумкинвал гуда.
“Лезги газетдиз” РД-дин хуьруьн майишатдин ва недай суьрсетдин министерстводин пресс-къуллугъдай хабар гайивал, алай йисан ругуд вацран нетижайралди, республикадин майишатра, санлай къачурла, 16,3 агъзур тонн михьи ва 22 агъзур тонн къушар чан аламаз алцумайла жезвай як гьасилнава. 2016-йисуз 46 агъзур тонндилай артух михьи як хьанай. Эхиримжи са шумуд йисан нетижаяр фикирда кьурла якъин жезвайвал, гьасилзавай якIун кьадар тахминан 40 процентдин гзаф хьанва.
Месела, анжах Мегьарамдхуьруьн районда авай къушчивилин “Гюней” комплексди алай йисан ругуд вацран вахтунда 2 агъзур тонн бройлердин як гьасилнава. И объект ишлемишиз вахкунихъ галаз сад хьиз, республикадин базарриз къушарин виниз тир еридин як агакьиз башламишна. Къушчивилин “Гюней” комплекс — им республикадин кар алай “Нетижалу АПК” проектдин сергьятра аваз арадал гъанвай инвестицийрин сад лагьай зурба кархана я. Ина йиса 4 агъзур тонн бройлердин як гьасилдай мумкинвал ава. Объектдал 100-далай виниз кIвалахдин чкаяр тешкилнава, ина алай аямдин эхиримжи технологияр ишлемишзава. Алай вахтунда комплексда, санлай къачурла, 300 агъзурдалай артух къушар хуьзва.
Карханади кIвалахиз анжах са йисни зур вахт ятIани, нетижаяр виле акьадайбур я. Республикадин базарра маса гузвай къушарин цIудан са пай як гьа и карханада гьасилнава. Къушчивилин комплексдин бройлерар Дагъустандилай къецепатани маса гузва. Мукьвал тир гележегда карханади йиса гьасилзавай бройлердин якIун кьадар 5,3 тонндив агакьарун планламишнава.
«Лезги газет»
