Алатай гьафтеда Сулейман-Сталь­ский райондин Вини СтIал­рин юкьван школада “Илимдиз кам” лишандик  кваз математикадай гьар йисуз кьиле тухун хъсан адетдиз элкъвенвай олимпиададин 2-тур кьиле фена. Адан сер­гьят­ра аваз  5-11-классра кIелзавай аялри чпин чирвилер ахтармишна. Ри­кIел хкин: сифтедай олимпиада ан­жах Вини СтIалрин юкьван школада кIелзавай аялрин чирвилерин ери ахтармишунин, хъсандиз кIел­завай аялар руьгьламишунин,  абурун гележег математикадихъ галаз ала­­къалу авунин мураддалди кьиле тухузвай. Ахпа ана Сулейман-Стальский райондин вири школайра кIелзавай аялриз чпин чирвилер къалурдай мумкинвал хьана.

Къенин юкъуз и олимпиада саки республикадин дережада аваз тешкилзавай гзаф важиблу серенжемдиз элкъвенва.

Олимпиададин тешкилатчи, ам кьиле тухузвай технический илимрин доктор, профессор, чна вичиз еке гьуьрметзавай, рес­публикадин са шумуд вузда же­гьил­риз чирвилер гузвай муаллим  Абдул  Гьажи­балаевич  Баламирзоеваз,  адахъ галаз и къени ­кардик чпин пайни кутазвай, хайи халкьдин геле­жег патал къайгъуда­ авай виридаз аферин ва баркалла! Къейд ийин, сифте са шумуд йи­суз Абдул муаллимди кьилди са вичин хсуси такьатрихъ и серенжем кьиле тухузвай.

Эхиримжи кьве йисуз “Илимдиз кам” олимпиададин пишкешрин фондуниз  “Леки” тIвар алай мергья­матлувилин, гьакIни культурадин, образованидин ва яшайишдин прог­раммаяр вилик тухуник пай кутазвай Зиявудин Мегьамедован “Пери” фондари такьатар чара ийизва. Виликан йисара хьиз, цIини и важиблу серенжем патал чпин вахт, къуватар ва са кьадар такьатар серф авур ксарик кьилин категориядин муаллимар тир Аскер Аскеров ва Гьабибулла Гьабибуллаев, физикадинни математикадин илимрин кандидат Мариф Къадимов, экономикадин илимрин доктор, профессор Абдусалим Абдулгьалимов ва масабур акатзава. “Интех-Софт” компанияди олимпиададин сергьятра аваз тапшуругъ кье­тIен­даказ гьялуналди тафаватлу хьайи Гьасрет Исмаиловаз (Ахцегь район, 9-класс) махсус пишкеш гана.

Малум хьайивал, алай йисуз олимпиадада республикадин ­Кьиб­лепатан территориальный округдик акатзавай саки вири районрин, гьакIни Махачкъала, Каспийск шегьеррин школайра кIелзавай 300-далай виниз аялри чпин устадвал къалурна. Абдул муаллимди суьгь­­­бет авурвал, эхиримжи вахта­ра олимпиададиз итижзавайбурун кьадар артух хьанва.

— Математикадиз къвердавай гзаф фикир гун — им, санлай вири уьл­кведа хьиз, чи республикадани дуьм-дуьз илимрихъ авай игьтияж артух хьунихъ галаз алакъалу я.

Алай девир илимдинни чирвилеринди, математика лагьайтIа, илимрин шагь  тирди агьалийри къвердавай генани аннамишзава. Чирвилерикай рахайтIа, гьа виликан йисара хьиз, шегьердин школайра кIелза­вай ая­лар викIегь я. Гьа са вахтунда, цIи 2 ва 3-чкаяр кьур аялрин чIе­хи пай хуьрерин школайра кIелза­вайбур я, — суьгьбетна Абдул муаллимди.

ЦIи “Илимдиз кам” олимпиададин сергьятра аваз М.Къадимова муаллимар патал лекция-тренинг тешкилна. “Леки” мергьяматлувилин фондунин презентацияни кьиле тухвана, Кьиблепатан Дагъустандин районра, кьилди къачуртIа, образованидин хиляй кьиле тухузвай еке кIвалахдикай  суьгьбетна.

Рагнеда  Рамалданова