Дагъустандин физический культурадин ва спортдин министерстводин сайтда хабар ганвайвал, 7 ва 8-октябрдиз Махачкъалада, Елена Исинбаевадин тIвару­нихъ галай “Труд” стадиондал, Да­гъустандин Кьилин призар патал акъажунар кьиле фена. Акъажунра хкянавай 26 командадик кваз 18 йисалай 70 йисалди яшара авай 300-далай виниз иштиракчийри чпин устадвал ва алакьунар къалурна. РикIел хкин: сад ла­гьай­ сефер и акъажунар 2014-йисуз, 2-сеферда алатай йисуз тешкилнай ва кьиле тухванай.

Кубок ачухуниз талукьарнавай шад мярекатдал Дагъустандин Гьукуматдин Председателдин Сад лагьай заместителдин везифаяр вахтуналди тамамарзавайди тир Анатолий Къарибова акъажунрин иштиракчийрин тIварунихъ чими келимаяр лагьана.

— Кьезил атлетика “спортдин Ханум” я. Ада лайихлудаказ машгьурвал къазанмишнава, спортдин и жуьредал машгъул жезвай ксарин кьадар къвердавай артух жезва. Кьезил атлетикади инсандин къастунал кIевивал ва къилих лигимарзава, инсанвилин хъсан ерияр тербияламишзава, обществода сагълам уьмуьр куьчуьрмишунин ивирар вилик тухуниз куьмекзава. Акьалтзавай несил тербияламишунин кардани спортдин и жуьредин роль екеди я, — къейдна Анатолий Шамсудиновича.

А.Къарибован гафарай мадни малум хьайивал, акъажунрин макьсад республикада кьезил атлетика кIвачел ахкьалдар хъувуникай ва ам мадни машгьуруникай ибарат  я.

— “Труд” стадион цIийикIа туьх­кIуьр хъувурдалай кьулухъ чахъ кьезил атлетикадай акъажунар лазим дережада тешкиллувал аваз кьиле тухудай мумкинвал ава.  Чи спортсменрихъ мадни виниз тир агалкьунар хьун патал кьезил атлетикадай жезмай кьван гзаф акъа­жунар кьиле тухун герек я. И акъа­жунри Дагъустанда кьезил атлетикадин жуьреяр вилик тухунин кардиз хъсан таъсирда,-мадни къейдна ада.

РД-дин физический культурадин ва спортдин министрдин везифаяр вахтуналди тамамарзавайди тир Мегьамед Мегьамедова вичин рахунра Дагъустандин кьезил атле­тикадин школадихъ баркаллу рехъ ва адетар авайди ри­кIел хкана.

— Кьезил атлетикадал машгъул­ чи спортсменри гьам международный, гьамни Вирироссиядин кесерлу майданра лайихлудаказ гьунарар къалуруналди уьлкведин кьезил атлетика вилик тухуник еке пай кутуна. Виридалайни хъсан нетижаяр диск яргъаз гадарунай Али Исаевахъ, кьакьанвилиз хкадарунай Юрий Большовахъ ва Светлана Лапинадихъ, чукурна яргъивилиз хкадарунай Алексей Переверзевахъ ва Владимир Шабановахъ, пая гваз хкадарунай Олимпиададин чемпионка Елена Исинбаевадихъ, кьезил атлетикадин амай жуьрейрайни гзаф масабурухъ хьана, — къейдна ада.

М.Мегьамедова мадни алава хъувурвал, республикадин спортдин ведомстводи Дагъустандин кьезил атлетикадин Федарациядихъ галаз саналди гьар йисуз яша­рин вири категорийрай 10-далай артух акъажунар кьиле тухузва.

Спортдин акъажунрин иштиракчийрин тIварунихъ хуш келимаяр лагьайбурун арада и турнирдин инициатор, “Дагъустан Республикадин Кьилин курсунин тереф хуьн” ДРОО-дин председатель Агьмед Абдуразакьовни  авай.

Кубокдин программадик агъадихъ галай жуьрейрай: жуьреба-жуьре мензилдиз чукурунай (100 м, 200 м, 400 м, 800 м, 1,5 км ва 3 км, гьа гьисабдай яз манийвилер алудна чукурунайни), акъвазай чкадилай яргъаз хкадарунай, ядро ва диск яргъаз гадарунай, эстафетадин чукурунай  акъажунар квай. ИкI, кьве юкъуз давам хьайи акъажунрин нетижада шегьеррин командайрин арада 1-чка Махачкъаладин, 2 ва 3-чкаяр, талукь тирвал,   Дербент ва Каспийск шегьеррин хкянавай командайри кьуна.

Районрин арада лагьайтIа, Леваша райондин-1, Ахвах райондин-2 ва Ахцегь райондин хкянавай командаяр 3-чкайриз лайихлу хьана.

Рагнеда Рамалданова

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя