Ветеранар тебрикна

Дербент райондин кьил Мегьамед Желилова, РД-дин юс­тициядин министр Ханлар Пашабегова, РД-дин Халкьдин Соб­ранидин депутат Ферзиллагь Исламова, Дербент,  Дагъустандин Огни шегьеррин ва Дербент райондин военный комиссар Адил Къулиева, райондин кьилин заместителар тир Садир Эмиргьамзаева, Фуад Шихиева, Белиж поселокдин кьил Рамиз Гьабибулаева Белиж поселокда амай Ватандин Чlехи дяведин ветеранриз — Аллагьверди Межидоваз, Гьамзат Къайтмазоваз ва Мария Швецовадиз Гъалибвилин сувар кlвалера мубаракна.

Вири ветеранриз РД-дин Кьилин, райондин, поселокдин кьилерин, мергьяматлувилин “Михьи рикlер” фондунин, “Киргу” алишверишдин кlвалин ва масабурун патай пул ва рикlел аламукьдай савкьатар гана.

Къагьриман Ибрагьимов

***

Ахцегь райондин регьбер Осман Абдулкеримов,  ГО-дин ва ЧС-дин крарин рекьяй РД-дин министр Нариман Къазимегьамедов, Ахцегь погранчастунин командир А.Хвощенко, райондин ветеранрин Советдин председатель Хайируллагь Велиев, военком Рафик Мегьамедов, райадминистрациядин кьилин заместитель Алмас Шуаев, УСЗН-дин начальник Алаудин Имамов районда амай   дяведин иштиракчи, кьакIиви  Исмаилов Неби Азизовичаз мугьман хьана.

“Чаз  Куьне Ватандин азадвални аслу туширвал патал тухвай женгерни чIугур зегьметар ватанпересвилинни викIегьвилин чешне я. Къуй Квез чандин сагъвал, руьгьдин мягькемвал, ислягьвал ва вири хъсанвилер хьурай!..”,- вичин хуш келимайрилай кьулухъ О.Абдулкеримова  РД-дин Кьил Рамазан Абдулатипован тебрикдин чар кIелна.

Ветерандин тIварцIихъ тебрикдин  гафар муькуь  мугьманрини лагьана. Абуру ветерандиз РД-дин ва райондин кьилерин, УСЗН-дин идарадин патай пулдин пишкешар гана.

Вичин нубатдай Неби Азизовича Исмаиловрин баркаллу стхайрин  женгерин рекьерин кьисметрикай куьрелди суьгьбетна, мугьманриз фу-чай теклифна ва сувар мубаракиз вичел кьил чIугунай, гьакI пишкешар гунай чухсагъул лагьана.

Дашдемир Шерифалиев