Эхиримжи пуд йисуз “Музейда йиф” мярекат Ахцегьа виликамаз хъсан гьазурвал акуналди ва жемятдин еке иштираквал аваз кьиле тухузва. Милли медениятдинни тарихдин къадир авай инсанри чпин патай аниз пишкешар яз гьар жуьре ядигарарни гъун адетдиз элкъвенва. ЦIи и мярекатдиз Ялахърин хуьруьн кавха Шихкерим Жабраилова вичин бадедин гъилин вижевай халича гъана.
-…Заз кьве хва ава, кьветхверар. ГъвечIи чIавуз зайиф яз, абур мукьвал-мукьвал азарлу жедай. Зи диде Къизилгуьла (1934-1997), “эгер и балаяр, сагъ хъхьана, ирели хьана акуртIа, бадедин гъилин са хъсан халича садакьа гуда” лагьана ниятнай, амма низ гудатIа тайинарначир. Аллагьдиз шукур, къе а аялрикай халис итимар хьанва. Гьайиф хьи, диде амач, амма а рагьметлудан садакьа гун чи хиве амай. Гьар са кардиз вичин вахт-кьисмет ава. Рагьметлу Гьири бадедин (1890-1981) гъилин халича-ядигар, садакьа яз, за къе музейдиз гузва. Зи фикирдалди, халкьдин милли культура ва тарих хуьзвай музейни мискIин, пIир хьтин кьетIен манадин чка я, — лагьана Ш.Жабраилова.
Багьа савкьатдай Ахцегьрин музейдин директор, РД-дин культурадин лайихлу работник Агьмед Дагъларова Ш.Жабраиловаз чухсагъул малумарна.
Дашдемир Шерифалиев
