Россиядин Федерациядин тIебиатдин ресурсрин ва экологиядин министерстводин теклифдалди, “Россиядин ятар” акциядин сергьятра аваз, уьлкведин вири регионра вацIарин, вирерин, гьуьлерин — цин гьамбарханайрин къерехар михьи авунихъ элкъуьрнавай серенжемар вахт-вахтунда тухун эхиримжи йисара хъсан адетдиз элкъвенва.
Дагъустан Республикадин цин объектар экологиядин, михьивилин жигьетдай авай гьал фикирда кьуна ва Экологиядин, Каспийдин, гьакIни цин маса объектрин йисан сергьятра аваз, 26-майдиз РД-дин тIебиатдин ресурсрин ва экологиядин министерстводи экология хуьнихъ элкъуьрнавай, “Чи вацIариз ва вирериз — михьи къерехар” кьил ганвай серенжем кьиле тухвана.
Ана, министерстводи хабар гузвайвал, идарайрин ва тешкилатрин, районрин, хуьрерин администрацийрин къуллугъчийри, республикадин юкьван махсус ва высший образованидин идарайрин студентри, общественный ва волонтеррин (гуьгьуьллубурун) гьерекатри, чкадин агьалийри иштиракна.
ВацIаринни вирерин, гьакIни гьуьлуьн къерехар михьи авунин къаст рикIе аваз экъечIай 1000-далай артух ксари, санлай къачурла, цин 13 объектдин къерехрай 800 шешел зирзибил кIватIна.
Кьиле тухвай серенжемдин нетижада Каспий гьуьлуьн, Сулак, Аваррин Къойсу, Андидин Къойсу, Ярык-Су, Шура-Озень, Гамри-Озень вацIарин, са жерге къарасуйрин, вирерин, булахрин къерехар зирзибилдикай михьна.
Михьивилер авунин кIвалахар Ирганайдин ГЭС-дин цин гьамбарханадин патаривни гегьеншдаказ тешкилнавай. Вирида сад хьана, ина пар чIугвадай 2 машиндавай зирзибил кIватIна ва лазим чкадиз тухвана.
Къейдна кIанда хьи, “Чи вацIариз ва вирериз-михьи къерехар” серенжемда, амай идарайрин къуллугъчийрихъ галаз сад хьиз, РД-дин печатдин ва информациядин министерстводин, республикадин массовый информациядин такьатрин, гьа жергедай яз “Лезги газетдин” редакциядин векилрини иштиракна.
Министерстводин ва адан къаюмвилик акатзавай СМИ-рин къуллугъчийри, къуватар сад авуна, Махачкъаладин Ак-Гель вирин къерехда авай паркуна (ина парк аваданламишунин, гуьзеларунин кIвалахар гьеле давам жезва) зирзибил кIватIна, къайда тваз куьмекарна.
Серенжемдин сергьятра аваз хейлин кIвалахар авунатIани, виреринни, вацIарин, иллаки гьуьлуьн къерехра зирзибил гьеле гзаф ама, гьаниз килигна тIебиатдин ресурсрин ва экологиядин министерстводи тIебиат хуьнин макьсаддалди тешкилнавай “Чи вацIариз ва вирериз — михьи къерехар” серенежем инлай кьулухъни тухун пландик кутунва, малумарна идарадин векилди.
Жасмина Саидова
