Сулейман-Стальский районда 2020-йисалди уьзуьмчивал вилик тухунин программа кьабулнава ва кардик акатнава. Адан бинедаллаз хуьруьн майишатдин карханайра, арендадин участокра цIийи уьзуьмлухар кутазва. Алатай йисуз районда санлай 161,5 гектарда (план 115 гектар яз) цIийи уьзуьмлухар кутуна.
2016-йисуз райондин хуьруьн майишатдин карханайри, лежбервилинни фермервилин майишатри, арендаторри, санлай къачурла, 9253 тонн (идакай 3419 тонн карханайрал гьалтзава) ципицIар кIватI хъувуна. Им виликан йисара кIватI хъувурдалай гзаф я.
Районда уьзуьмчивал вилик тухуник инвесторри тешкилнавай “Гуьльгери вацI” ва “Зардиян” ООО-рини еке пай кутазва.
Лагьана кIанда, ина кIвалах хъсандаказ тешкилнава ва гьар йисуз ципицIрин тарифдин бегьерар гьасилзава (гектардин бегьерлувал — 100-120 центнер).
Санлай къачурла, алай вахтунда районда 1360 гектар уьзуьмлухар ава, абурукай 906 гектар бегьердал атанвайбур я.
И йикъара чун Эминхуьруьн мулкунал инвесторди тешкилнавай “ЧIереяр” ООО-диз фена, ана кIвалахар кьиле физвай гьалдихъ галаз мукьувай таниш хьана. Ина уьзуьмлухрин жергейрин араяр цанва, тегьенгрин пунариз пер янава, абур обрезка авуна акьалтIарнава. Рабочияр жегьил уьзуьмлухра даяхар акIурунал, ятар гунал машгъул тир. Икьван чIавалди саки 50 гектар жегьил уьзуьмлухра даяхар акIурнава, амай майданра акIурдайбурни ДаркIуш-Къазмайрал кардик квай цехдай хкана, чкадал ала.
Карханадин управляющий Мавлудин Агъарзаева лагьайвал, гатфарин кIвалахар кьиле тухунал саки 50 кас рабочияр ва механизаторар машгъул я.
Уьзуьмлухар кутунин кIвалах ина зулухъай давамарда. И кар патал чил ва чубукар гьазурнава.
Инвестицийрин проектдин бинедаллаз, ООО-да 150 гектарда уьзуьмлухар кутадайвал я.
Лагьана кIанда, Эминхуьре уьзуьмчивилел са шумуд кас арендаторарни машгъул жезва. Надир Яхьяеван, Эльмира Агъамирзоевадин, Самур Гьамзатован, Миламудин Мегьамедован кIвачихъ галай уьзуьмлухарни хъсан гьалда ава. Кьилди къачуртIа, М.Мегьамедован кIвачихъ 9 йис идалай вилик кутунвай 3,5 гектар уьзуьмлухар гала. Чаз акурвал, анра агротехникадин са жерге серенжемар кьиле тухванва, мукьвара гатфарин ятарни гана.
Ихьтин са карни къейд ийиз кIанзава: Миламудинахъ лежбервилинни фермервилин майишат тешкилдай фикирни ава. И мураддалди ада 4 гектарда шуьмягъин къелемар цанва, абурухъ иесивилелди гелкъуьн тешкилнава.
— Санлай къачурла, райондин карханайрин, лежбервилин майишатрин ва арендаторрин кIвачихъ галай уьзуьмлухра гатфарин чуьлдин кIвалахар кьиле физвай гьалдилай чун рази я, — лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. — Зегьмет чIугун — им гележегдин бул бегьердин замин я. Умуд кутаз кIанзава хьи, алай йисуз районда 10 000 тонндилай тIимил тушиз ципицIар кIватI хъийида.
Хазран Кьасумов
