Лезгийрин пешекарвилин режиссурадин диб кутур, милли театрдин искусство вини дережадиз хкажай, бажарагълу жегьилрикай пешекар  актерар гьазурай муаллим, режиссер, актер, драматург, хъсан тешкилатчи,  Дагъустан Республикадин халкьдин артист, РСФСР-дин лайихлу артист Багъиш Айдаеван 85 йис тамам хьуниз талукьарнавай рикlел хкунин мярекат кьиле фена.

Лезгийрин СтIал Сулейманан тIварунихъ галай госмуздрамтеатрдиз  Кьиблепатан Дагъустандин шегьерринни районрин агьалияр, общественный тешкилатрин векилар, юбилярдин яратмишунрал рикl алайбур, адан  дустар атанвай. Залда Дербент шегьердин кьил Малик Баглиев, администрациядин маса къуллугъчиярни авай.

Театрдин фойеда Б. Айдаеван яратмишунриз талукьарнавай выставка ачухнавай.

Хъсандиз туькIуьрнавай сегьнедиз Лезги театрдин директор Ди­нара Эминова ва кьилин режиссер Мирзабег Мирзабегов атана­.

Д.Эминовади ва М.Мирзабегова Багъиш Айдаеван уьмуьрдинни яратмишунрин рекьикай суьгьбетна. Абурун суьгьбетдай малум хьайивал, Багъиш Айдаев Дагъузпара райондин Мискискарин хуьре дидедиз хьана. Филерин школа акьалтlарай жегьил­ Москвадин А.Луначарскийдин тlварунихъ галай театральный ин­ститутдиз гьахьна. Школада кlелзамаз гьевескаррин жергеда аваз концертра, мектебда эцигай бязи тамашайра иштирак авуниз килигна, ада экзаменар агалкьунралди вахкузва.  Институтдин кьабулзавай коммиссияди ам 2-курсунин студентрин сиягьдик кутазва.

1955-йисуз институт акьалтlарна, ада Лезги театрда кIвалахиз башламишзава.

— Ада жанлу образар яратмишна (“Чара авачир жерягьвал” тамашада Роберан, “Рехи руш” тамашада Дочунан ва гьакl масабур) вич еке бажарагъ авай устад тирди къалурзава. Жегьилзамаз адал театрдин директордин везифаярни ихтибарзава. Ада актервилин пеше гадарзавач. И йисара Б.Айдаева “Дурна” къемедада ашукь Мурадан, “Эгер рикlиз кlан хьайитlа” тамашада батрак Магьсудан жанлу къаматар арадал гъизва.  Багъиш Айдаева кинодани (“Ромео ва Джульета”, “Цавалай цифер алатзава”) рикlел аламукьдай образар яратмишна, — лагьана театрдин руководителди…

1960-йисуз адаз Москвада кьиле фейи Дагъустандин искусстводин ва литературадин декадада иштиракун кьисмет хьана.

Б.Айдаева эцигай гьар са тамаша чи театр паталди кьетlен са вакъиадиз элкъвезвай. Москвадин ГИТИС-да режиссервилин курсар куьтягьна хтай ада сифте яз Къияс Межидован “Урусатдин цуьк” пьеса сегьнедал эцигнай, — алава хъувуна абуру.

Малик Баглиева къейдайвал, Багъиш Айдаева Дагъустандин театрдин искусстводин сегьнеда нурлу ва гужлу гел туна. Ада яратмишай гьар са къамат, ада эцигай гьар са тамаша халкьдин рикlел аламукьдайди хьана.

— Дербент шегьердин депутатрин Собранидал Багъиш Айдаеван тlвар эбеди авунин мураддалди шегьердин АВАИН-4 микрарайондин са куьчедиз адан тlвар гунин къарар кьабулнава, — муштулух гана М.Баглиева.

Багъиш Айдаев, адан пешекарвал ва Лезги театр патал ада авур алахъунар “Дагюгстрой” ООО-дин регьбер Гьажи Жабраилова, Дербент шегьердин Гьуьрметлу агьали Гьуьсейнбала Гьуь­сейнова, Дагъустандин халкьдин артист, Б.Айдаеван хуьруьнви Фаризат Зейналовади рикIел хкана.

А.Саидова, А.Сайдумова, С.Саидгьасанова, Н.Къарибова Багъиш  Айдаеваз бахшнавай одаяр кlелна, манияр лагьана.  “Ашукь Саид”, “Фундугъбег”, “Ашукь Къариб”, “Къазимегьамед” тамашайрай чlукар къалурна. Мярекатда РФ-дин лайихлу артист А.Гьабибова, Дагъустандин халкьдин артистар М. Мамедова, Ш.Закирьяева, З.Къухмазовади, Дагъустандин лайихлу артистар  тир С. Думаева, М. Мурадхановади, Р.Пирвердиева, артистар К.Думаева, В.Сулейманова, Э.Къарахановади, Э.Вагьабо­вади, Ф.Фейзулаевади, А.Керимовади, Я.Сардарханова, Р. Мирзоева, Г.Эмиралиевани иштиракна. Мярекатдин итижлу программа туькIуьрайди Азиз Мирзабегов я.

Эхирдай рахай Багъиш Айдаеван хва Рамидин Айдаева мярекатда иштирак авур виридаз, бубадин тlварцlихъ чими, хуш келимаяр лагьайбуруз, театрдин коллективдиз, шегьердин администрациядин руководстводиз сагърай лагьана.

* * *

Вучиз ятIани важиблу и мярекатда я РД-дин культурадин ми­нистерстводин, я Докъузпара райондин администрациядин векилри иштиракнач.

Къагьриман Ибрагьимов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя