Сулейман-Стальский районда чIехи хуьрерикай сад тир ДаркIуш-Къазмайрилай баркаллу инсанар гзаф акъатна: академик Иметхан Шабанов, летчик-истребитель Сергей Муртузалиев, РФ-дин ла­йихлу, РД-дин халкьдин артист Абдулкъадир Сайдумов, полковник, лектор-международник Эседин Эминов, Ленинан ордендин сагьиб Абдуселим Велибегов…

Хайи хуьр, район, Лезгистан яргъарани машгьур авур даркIушвийрин арада РФ-дин лайихлу архитектор, РД-дин искусствойрин лайихлу деятель, Россиядин архитектурадин ва эцигунрин илимрин Академиядин гьуьрметлу академик, РагъакIидай патан уьлквейрин архитектурадин милли Академиядин академик, СССР­-дин ва Россиядин Федерациядин архитекторрин союзрин член Керимов  Керим  Селимовича  кьетIен чка кьазва.

Мукьвара тIвар-ван авай архитекторди 75 йисан юбилей къейдна. Идахъ галаз алакъа­лу­ яз К.Керимова ДаркIуш-Къаз­майрин юкьван школада ви­чин архитектурадин кIвалах­рин выставка ачухна. Сифте яз тешкилай важиблу и мярекатдиз Сулейман-Стальский райондин регьбер Нариман Абдулмуталибов кьиле аваз райондин администрациядин жавабдар къуллугъчияр, гзаф кьадар дар­кIуш­вияр, мугьманар атанвай.

Мярекатдал школадин директор Савзихан Савзиханова Керим Керимован уьмуьрдин ва яратмишунрин рекьикай ­гегьенш рахунар авуна. Ада къейд авурвал, Керим Селимович 1942-йисуз ДаркIушрин хуьре дидедиз хьана. 1973-йи­суз Киевдин инженервилинни эцигунрин институтдин архитектурадин факультет акьал­тIар­на. Вичин зегьметдин рехъ ада “Дагестангражданпроект” ин­ститутда архитекторвиле кIв­а­­­лахунилай башламишна. 1975-йисан декабрдилай К.Керимова “Дагестанколхозпроект” институтда проектрин кьилин архитектор, архитектурно-планировочный отделдин начальник, институтдин кьилин ар­­хитектор яз  кIвалахна. 1978-йи­сан декабрдиз  Махачкъала шегьердин кьилин архитекторвиле тайинарна. Жавабдар и кIва­лах ада 7 йисуз кьиле тухвана. 1985-йисан ноябрдилай ада “Дагестангражданпроект” институтда кьилин архитектор — директордин заместитель яз, 1991-йисан мартдилай Рос­сия­дин архитекторрин Союздин Да­­гъустандин отделенидин правленидин председателвиле кIвалахна. Гьа са вахтунда ада вичин яратмишунрин мастерскойни ачухна.

Алай вахтунда К.С.Керимова “Атом” ЗАО-дин проектрин бюродин директорвиле кIвалахзава.

Керим Селимович 80-далай виниз яратмишунрин кIва­лахрин автор я. Ам архитекторрин Союздин пуд съезддин делегатвиле, кьве сеферда Махачкъала шегьердин Советдин депутатвиле, РД-дин Гьукуматдин Председателдин патав гвай экспертный Советдин ва Государстводин премияр гунин рекьяй комиссиядин членвиле хкяна.

К.С.Керимов Махачкъалада, Бакуда, Нальчикда, Пятигорскда, Каспийскда ва масанра тухвай архитектурадин кIва­лахрин Вирисоюздин, Вирироссиядин ва международный конкурсрин, фестивалрин гъалибчи, премийрин лауреат я.

Мярекатдал Керим Селимовичан лайихлувилерикай ва бажарагъдикай хуьруьн поселенидин администрациядин кьил Жабраил Керимова, хуьруьнвияр Алимирзе Алимирзоева, Агъамирзе Уьзденова, 11-классдин ученица Амина Мегьамедрасуловади ва масабуруни суьгьбетна.

— Чи баркаллу районэгьли, бажарагълу архитектор Керим Селимович Россияда, дуьнья­да машгьур кас я, и кардал чна дамахни ийизва, — лагьана Н.Абдулмуталибова. — Проектар туь­кIуьрун регьят кар туш. Къенин выставкадиз килигайла лугьуз жеда хьи, Керим Селимовичаз Аллагьди кье­тIен пай ганва. Адан проектрай эцигнавай яшайишдин кIвале­ри, общественный дараматри чи республикадин, уьлкведин шегьерар гуьрчегарнава.

Выставка ачухунин мярекатдилай гуьгъуьниз Н.Абдулмуталибов, мугьманар ва хуьруьнвияр К.Керимован яратмишунрин выставкада эцигнавай ар­хитектурадин кIвалахрихъ га­лаз мукьувай таниш хьана.  Гьа­къикъатдани, выставкада эцигнавай проектри, абурун бинедаллаз Махачкъала, Каспий­ск, Дербент ва маса ше­гьерра эцигнавай яшайишдин кIвале­ри, маса дараматри тамашачийрин фикир чпел желб­на.

Малум хьайивал, Керим Селимовича Сулейман-Стальский районда культурадин “Шарвили” центр эцигун патални проектар гьазурнава. Абурузни выставкадин иштиракчийри еке итиж авуна.

— Хайи хуьре выставка ачухдай фикир захъ фадлай авайди тир. Эхирни зи мурад кьилиз­ акъатна, и кардал зун кьадар авачир кьван шад я, — къейдна ада.

Чаз малум хьайивал, Керим Се­лимовичахъ пуд велед (са гадани кьве руш) ава.

Архитектурадин рекьяй кьилин образование къачунвай абуру бубадин кар давамзава.

 

Хазран Кьасумов