Алатай гьафтеда Цмуррин юкьван школада инновациядинни образованидин “Передвижная роболаборатория” проект уьмуьрдиз кечирмишунин мураддалди менфятлу мярекат кьиле тухвана.
Мярекат школадин директор Али Пашаева ачухна. Ада къейд авурвал, робототехника ва компьютердин программаяр кIелунин хиле кардик кутуни кIелзавайбурун вилик цIийи мумкинвилер ачухда.
“Передвижная роболаборатория” проект образованидин хиле уьмуьрдиз кечирмишунихъ авай менфятлувиликай мергьяматлувилин “Пери” фондунин Event — менеджер Мегьамед Чеэраева гегьеншдиз суьгьбетна.
Мярекатдин сергьятра аваз райондин школайра 2-8-классра кIелзавай аялрин дестейрин (гьар дестеда 7 кас авай) арада робототехника чир хьунай акъажунар тухвана. Анал “чирвилерин майданар” тешкилнавай, кIелзавайбурун арада викторинаяр, мини-акъажунар, мергьяматлувилин “Пери” фондуни мастер-классар тухвана, гьакIни роботрин са шумуд жуьре къалурзавай выставка тешкилна.
“Робофутбол” ва “Робосумо” мастер-классра кIелзавайбуруз чпин гъилералди роботар кIватIдай ва школьникриз пультдин куьмекдалди чеб футболдин ва сумодин майданрал алайди гьисс ийидай мумкинвал гана.
Акъажунра тафаватлу хьайи школьникриз мергьяматлувилин “Пери” фондунин патай махсус значокар гана.
“Робототехникадин гьафте” проект уьмуьрдиз кечирмишунин мярекатар кьиле физвай Цмуррин юкьван школадиз, муаллимриз 9 квартирадикай ибарат кIвалин ва производствадин цехрин эцигунрал Сулейман-Стальский райондин кьил Нариман Абдулмуталибовни фена.
Малум тирвал, 120 ученикдиз чкаяр авай Цмуррин юкьван школа 2016-йисан сентябрдиз ишлемишиз вахкана. Алай аямдин школа эцигунин ва анаг цIийи тадаракралди таъминарунин кIвалахар Марат Шайдаева тешкилай мергьяматлувилин “Село” фондуни кьилиз акъудна. И проектдиз 50 миллион манатдилай виниз пул акъатна. ЦIийи школа чпин къимет 5 миллион манатдилай виниз тир тадаракралди таъминарнава. Абурук къецепатан чIаларин классар, лабораторияр, информатикадин класс акатзава.
Школадин проект гьазурдайла, инвесторди муаллимар патал кIвалер, школьникриз дерзичивилин, токарвилин, кIарас гьялдай пешекарар гьазурдай устIарханаяр эцигун хиве кьунай. Мергьяматлувилин фондуни Дагъустандин государстводин аграрный университетдин Аграрно-экономический техникумдихъ галаз амадагвилин алакъаяр хуьнни планламишнава. Анрин муаллимри 9-11-классра кIелзавайбуруз пешекарвал къачунин карда куьмекар гудайвал я. Рабочий пеше къачунвайвилин гьакъиндай шагьадатнамаяр гвайбурувай, школа акьалтIарайла, Аграрно-экономический техникумдик экечIиз жеда. Техникумдилай кьулухъ абур Дагъустандин ГАУ-дин 2-курсуниз кьабулда.
Вичик нек, емишар гьялдай, комбикормаяр гьазурдай цехар акатдай производстводин базада пешекарвилин сифтегьан чирвилер къачун тешкилда. Хьайи къазанжияр инвестор Марат Шайдаевахъ школадин игьтияжриз ва муаллимриз алава мажибар гуниз серфдай фикир ава. Н.Абдулмуталибов школада тухузвай кIвалахрилай рази яз амукьна.
Жабраил Асланов,
Хазран Кьасумов
