Алатай йисан 29-декабрдиз Докъузпара райондин Кьилер хуьре (Миграгъ-Къазмаяр) “Бахча” тlвар алай аялрин цlийи бахча ачухунин шад мярекат кьиле фена.

Мярекатда Докъузпара райондин кьил Абдурагьим Алискерова, адан заместителри, райондин хуьрерин администрацийрин кьилери, тешкилатринни идарайрин жавабдар къуллугъчийри, Кьилер, Къалажух ва Миграгъ хуьрерин агьалийри ишти­ракна.

Цlийиз ачухай аялрин бахча винидихъ тlварар кьунвай хуьрерин гъвечIи агьалийриз  Цlийи йисан вилик авур халисан савкьатдиз элкъвена. Хсуси инвестор Шагьлар Бухсаеван такьатралди эцигнавай бахчада неинки Кьилер хуьруьн, гьакl Миграгъ ва Къалажух хуьрерин аялрини тербия ва мектебдиз фидалди вилик герек тир чирвилер къачуда.

Кардик кутунвай “Бахчада” 150 бицlекдиз чка жеда. Цlийи бахчадихъ сад-садаз ухшар кьве мертебадикай ибарат кьве дарамат ава, анра ая­лар патал вири жуьредин шартlар тешкилнава.

Шад мярекатдал Докъузпара райондин кьил Абдурагьим Алискерова райондин вири агьалийриз, кlватl хьанвай аялриз, абурун диде-бубайриз цlийи бахча ачухун ва Цlийи йис тебрикна, агалкьунар хьун алхишна. Вичин рахунра ада дарамат арадал гъунин кардик инвестор Ш.Бухсаева кутур чlехи пайни къейдна ва чухсагъул малумарна. Малум хьайивал, районда  гуьрчег  и бахча ахъаюнин мярекат Бухсаевар себеб яз кьиле фена.

Тебрикдин гафар Докъузпара райондин  образовани­дин управленидин начальник Гъвейибег Шагьвеледов, инвестор Шагьлар Бухсаев рахана.

Аялрини и шад мярекатда манияр тамамарна, шиирар кlелна, нумраяр къалурна. Маш­гьур ашукь Шемшира тебрикдин манийралди мярекат гурлу авуна.

Мярекат кьиле фейи вахтунда райондин кьил А.Алискерова цlийи “Бахчадин” заведующий тир Милана Бухсае­вадив “къизилдин” куьлег вахкана.

Заведующий М.Бухсаевади къейд авурвал, аялрин цlийи бахчадиз кlвалахал жеблнавай тербиячияр вири педагогвилин образование авайбур я. Алай вахтунда винидихъ тlварар кьунвай пуд хуьряй 70 аялдин гьакъиндай диде-бубайри арзаяр вуганва, амма им гьеле эгечlун я, аялар кьабулун давам жезва.

Эхирдай райондин кьил А. Алискерова, образованидин управленидин начальник Гъ.Шагьвеледова, инвестор Ш.Бухсаева, “Бахчадин” заведующий М.Бухсаевади лишанлу яру лент атlана, абур  бахчадин дараматдин къенепатаз килигна.

Куругъли ФЕРЗАЛИЕВ

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя