“Спортивная борьба Дагестана” сайтдин векил  Арсен  Мегьамедовахъ  галаз интервьюда  Даурен  Куругълиева  2017-йисан сезондин нетижаяр кьунва ва мукьвал тир гележегда вичин планрикай суьгьбетна.

  • 2017-йисан зулухъ вуна адетдиндалай тIимил бягьсер тухвана. ТIарвал хьанвайни?

— 2016-йисан зулуз за пуд турнирда иштиракна ва немсерин Бундеслигадани бягьс тухвана. И сеферда лагьайтIа, анжах октябрдин эхирай Бугленда кьиле фейи Шихсаидован турнирдин иштиракчи тир. Виликрай кIвачIиз гайи тIарвили гьа ина вичикай хабар хгана. Гьавиляй Владикавказда “Аланы” турнирдиз  ва Къазахстанда Кунаеврин мемориалдиз физ хьанач.

  • Алатай сезонда вири бягьсера вуна гъалибвал къачур Бундеслигадиз фин фикирдик квачирни?

— Ана лагьана хьи, за иштиракун багьаз акъваззава. ГьакIни Индиядин лигада иштиракиз кIанза­вай, амма зи заланвилин категория — 86 кг-дал къведалди авачир.

  • ТIарвал хьайи чка хъсан хъхьанвани?

— Эхь, гъилин тIарвили инжиклу хъийизмач. Физиотерапиядин процедурайриз фена, ахпа тренажёррал гъилив кIвалахиз туна, жуван бедендин гьал къайдада хуьн патал яларзавай. Декабрдиз гьасирдал тренировкаяр башламиш хъувуна, Дагъустандин хкягъай командадин Адлерда кьиле фейи кьве гьафтедин учебно-тренировочный сборра иштиракна.

  • Алатай сезондиз къачур жуван камариз вуна гьихьтин къимет гузва?

— Зун Европадин чемпионатда гъалиб хьана ва им спортдин зи уьмуьрда виридалайни хъсан нетижа я. Анжах ахпа Ингушетияда кьиле фейи Россиядин чемпионатда гъалатIар ахъайна, призёррин жергеда гьатнач. Жувавай жуваз “вад” эцигиз жедач, амма кIеви “кьуд” къазанмишна.

  • Алава яз, тIарвал себеб яз, коммерческий турнира къазанмишдай мумкинвиликай магьрум хьана…

— Санлай къачурла, къазанмишунриз талукь яз 2017-йис зун патал хийирлуди хьана. “Европадай” ватандашри заз джип — двухсотый “Тойота” ва Дербентда квартира ба­гъишна ва мад са машин за Бугленда къазанмишна.

  • Алатай йисуз борецрин са шумуд мехъерар хьана. Дагъустандин хкягъай командадик квай ви яшда авай саки вири борецар эвленмиш хьанва. Вуна субай уьмуьрдал мус эхир эцигда?

— Гила вахтар я, зани а кардикай фикирзава, амма гьелелиг жуван гележегдин уьмуьр алакъаламишдай руш гьалтнавач.

  • Вахъ пара болельщикар ава. “Йисан инсан” конкурсда вуна “Йисан спортсмен” номинациядай Гьажимурад Рашидоваз рехъ га­натIа­ни, гзаф сесер кIватIна — амай номинацийрай лауреатрилай артух. Ви болельщикар гьина гзаф ава — исятда яшамиш жезвай ва тре­нировкаяр ийизвай Махач­къалада, тахьайтIа, вун дидедиз хьайи, чIехи хьайи, ви бубайрин ватан тир Кьиблепатан Дагъус­танда?

— Жаваб гун четин я. Анжах болельщикар, чебни гзаф хьунал зун шад я. Зак и карди руьгь кутазва ва къастунал мадни кIеви хьана тренировкаяр ийизва, акъажунра иштиракзава, гъалибвилер къазанмишиз алахъзава. Тереф хуьнай за жуван болельщикриз сагърай лугьузва ва жуван виниз тир нетижайралди абур шадарда.

  • ЦIийи йисалай акъажунрин йикъара заланвал алцумунин цIийи къайда къуватда гьатзава. И кардин гьакъиндай вуч лугьуда?

— Са шумуд килограмм гадарна кIанзавай борецриз четин жеда. Зи адетдин заланвал 89 кг я ва и кардай зал четинвилер гьалтда лагьана за фикирзавач. Белки виликандалай четинни жеда. ЦIийи къайда кардик кутунвай акъажунра за гьелелиг бягьсер тухванвач, исятда авайди экуьнахъ алцумайдалай кьулухъ жува-жув гьикI гьиссдатIа лугьуз фикирар авун я.

  • Ярыгинан турнирда гъалибвал патал бягьс тухуз гьазур яни?

— И кар и йикъара Махачкъалада кьиле фидай сборрилай кьулухъ лугьуз жеда. Алатай йисуз за “Ярыгинскийда” гъалибвал къачуна, гила маса са нетижадини зун рази ийидач. Гъалиб жеда — Европадин чемпионатдиз акъатда, и кар лап гзаф кIанзава, иллаки акъажунар Дагъустанда кьиле фидайди гьисаба кьуртIа.

«Лезги газет»

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя