Алай йисан 23-майдиз Махачкъалада, Дагъустандин образование еримлу ийидай институтда, лезги литературадай «ГъвечIи халкьдин чIехи шаир» лишандик кваз Дагъустандин халкьдин шаир СтIал Сулейман хайи юкъуз талукьарнавай мастер-класс кьиле фена. И проектдин автор Сулейман-Стальский райондин Герейханован хуьруьн 1-нумрадин юкьван мектебдин муаллим Шамсудин Магьамдаров ва соавторни Герейханован хуьруьн 2-нумрадин юкьван мектебдин муаллим Раиса Алиметова тир.

СтIал Сулейманан яратмишунриз талукьарнавай мярекатда пешекарвал хкаждай курсарин руководитель Н. Таймуровади, Дагъустандин образование еримлу ийидай институтдин пешекарри, республикадин районринни хуьрерин, Махачкъаладин, Каспийскдин мектебра лезги чIалан тарсар тухузвай хейлин муаллимри иштиракна.

Курсарин руководстводи ва мугьманри «ГъвечIи халкьдин чIехи шаир» проектдиз еке къимет гана ва адан авторрив институтдин патай гьуьрметдин чарар вахкана.

Къейд ийин хьи, и мярекат Ш.Магьамдаровани Р.Алиметовади тухузвай сад лагьай мярекат туш. 19-апрелдиз абуру Дербент шегьердин 18-нумрадин гимназиядани СтIал Сулейманан яратмишунриз талукьарнавай мярекат тешкилнай. Ихьтин гьерекатралди, лезги чIалан къадир авай муаллимри XX асирдин Гомеран ирс чируник ва машгьур авуник чпин лайихлу пайни кутазва.

[KGVID]https://lezgigazet.ru/wp-content/uploads/2017/05/WhatsApp-Video-2017-05-25-at-21.03.28.mp4[/KGVID]

«Лезги газет»