Мегьарамдхуьруьн райондин администрациядин пресс-къуллугъди «Лезги газетдин» редакциядиз хабар гайивал, 2016-йисан августдилай райондихъ галаз кутIуннавай амадагвилин икьрардал бинеламиш хьана, аниз Ленинградский областдин Тосненский райондай мугьманар атанвай: Тосненский райондин администрациядин кьил Владимир Дернов, адан куьмекчи Петр Семкин, карчи Денис Егоров, Тосненский районда Дагъустандин векил, спортдин ветеран, Тоснодин общественный Советдин член Исакь Гьажиев. Абур “Мегьарамдхуьруьн район” МР-дин кьил Фарид Агьмедова кьабулна.
— Чи районрин арада яргъи мензилар аватIани, ида чи дуствилин алакъайриз манийвалзавач,- къейдна Ф.Агьмедова. — Чахъ санал кIвалахунин, амадагвилин алакъаяр вилик тухунин карда еке мумкинвилер ава. Экономикадин, яшайишдин, алишверишдин, образованидин, спортдин, туризмдин рекьяй чна санал кьиле тухун патал раижнавай проектрихъ бегьерлу нетижаяр жедайдак чна умуд кутазва.
Гуьруьшдин вахтунда Владимир Дернова Фарид Агьмедовав “Дагъустан Республикадин Мегьарамдхуьруьн райондин ва Ленинградский областдин Тосненский райондин арада стхавилин алакъаяр гегьеншаруник чIехи пай кутунай” Чухсагъулдин чар вахкана.
* * *
Мегьарамдхуьруьн райондин “Гранит” СПК-дин 30 гектардин чилел Тоснодин векилри Ленинградский область патал фад дигмиш жедай кьетIен сортарин картуфар битмишарзава. Гуьруьшдин сергьятра аваз “Гранит” СПК-диз РД-дин хуьруьн майишатдин ва суьрсетдин министр Мусафенди Велимурадов мугьман хьана. Ада къейд авурвал, и гуьруьшри санал кIвалахунин алакъаяр вилик тухуниз, агалкьунрин дережа хкажуниз куьмекда.
* * *
Дагъустанда авайла, Тосно шегьердин векилар Фарид Агьмедовни галаз республикадин кьилин вузрикай сад тир ДГТУ-дизни мугьман хьана. Делегация техуниверситетдин ректор, технический илимрин доктор, профессор, РФ-дин илимрин лайихлу деятель Тагьир Исмаилова кьабулна. Ректорди абуруз техуниверситетди международный ва вирироссиядин салонра иштиракзавайдакай, илимдинни ахтармишунардай кIвалахар вини дережада аваз тухузвайдакай малумарна.
Атанвай мугьманри Тосненский райондиз инженерно-технический рекьяй чарасуз пешекарар герек тирди къейдна ва пешекарвилин дережа хкажунин курсар ДГТУ-да тухунин итиж авайдакай лагьана.
Т.Исмаилова ДГТУ-ди Санкт-Петербургдин са шумуд вуздихъ галаз алакъадин икьрарар кутIуннавайдини къейдна.
* * *
Малум тирвал, кьве райондини спортдин рекьяйни сих алакъаяр хуьзва. Алай йисан мартдиз дзюдодай Тосно шегьерда кьиле фейи акъажунра Мегьарамдхуьруьн командади 2-чка кьуна.
Кеферпатай атанвай мугьманри Мегьарамдхуьруьн райондин тIебиатдин гуьзел чкайриз сейр авуна ва абур гьейран хьана амукьна.
Фарид Агьмедова абур райондиз атунал разивална ва уьмуьрдиз бажармишун кьетIнавай проектар кьилиз акъудиз жедайдахъ инанмиш тирди лагьана. Гуьгъуьнлай ада атанвай мугьманрив гьуьрметдин грамотаяр вахкана.
Гьазурайди — Земфира Бабаева
