Алатай гьафтедин эхиримжи йикъара РД-дин хуьруьн майишатдин ва недай суьрсетдин министрдин сад лагьай земеститель Адильхан Ганакаев, набататчивилин ва багъманчивилин управленидин начальник Агьмед Расулов, Дагъустандин государстводин аграрный университетдин (ДагГАУ) ректор Зайдин Жамбулатов ва маса къуллугъчияр галаз, Сулейман-Стальский райондин Цмуррин хуьруьз мугьман хьана.
Министерстводай чаз хабар гайивал, республикадин меркездай тир пешекарар, райондин муниципалитетдин кьил Нариман Абдулмуталибов, гьакIни “Хуьр” тIвар алаз тешкилнавай мергьяматлувилин фондунин учредитель Марат Шайдаев галаз, чкадин умуми образованидин школадиз фена. Ина, рикIел хкин, чIехи классра кIелзавай аялриз хуьруьн майишатдихъ галаз алакъалу пешейрай чирвилер гунин проект кьилиз акъудзава. Кьилди къачуртIа, ДагГАУ-дин пешекарри ина “УстIар — кьурай хилер атIудайди” ва “УстIар-багъманчи” пешейрай тарсар гузва. Школадин гьар жуьре яшарин аялар патал жуьреба-жуьре лекцияр, тежрибадин тарсар гьазурнава.
Чна идалай виликни хабар гайивал, Цмуррин хуьре алай аямдин лап хъсан тадаракралди таъминарнавай ва 120 аял патал чкаяр авай школа Марат Шайдаеван фондунин такьатрихъ эцигнава. Инал къейд ийин, ада хайи районда багъманчивилин хел виликди тухунин карда активнидаказ иштиракзава.
ИкI, 2-декабрдиз адан теклифдалди, хуьруьн къерехда авай 38 гектардин майданда шуьмягърин багъ кутуна.
“Ата-буба” сортунин шуьмягърин къелемар къунши Азербайжандай маса къачуна. ЦIийи багъ тамамдаказ бегьердал 5 йисалай къведа. А чIавуз ина гьар са гектардай 3 тонндилай артух шуьмягъар кIватIун гуьзлемишзава. Идалайни гъейри, инвестордин фикирда шуьмягъар хадай цех кардик кутунни ава. ИкI хьайила, шуьмягъар хвехвер хъирейрикай михьи авуна маса гуз жеда.
Гъиле кьунвай кIвалахдихъ гележег авайди Адильхан Ганакаевани къейдна. “Кутунвай багъди, производстводин мумкинвилерни фикирда кьурла, гележегда хъсан бегьерар гудайдахъ ва, нетижа яз, виниз тир къазанжияр гъидайдахъ инанмишвалдай мумкинвал гузва, гьикI лагьайтIа шуьмягъар алай вахтунда экономикадин гзаф хилера, кьилди къачуртIа, ширинлухар гьазурдай промышленностда булдаказ ишлемишзава”, — лагьана ада.
А.Ганакаева гьакIни алава хъувурвал, Цмуррин хуьре арадал гъизвай къурулушдихъ алай аямдин шартIара еке гележег ава.
Сулейман-Стальский районда багъманчивилин хел йигин еришралди виликди тухунилай гъейри, акьалтзавай жегьил несил дуьзгуьндаказ тербияламишунин месэлайризни еке фикир гузва.
Республикадин идарайрай тир пешекарри къейд авурвал, ина кьиле тухузвай мярекатри жегьилрин арада багъманчивилихъ галаз алакъалу пешейриз ийизвай итиж артухарунал гъизва. Алай девирда, вири уьлкведа хуьруьн майишатдин пешекарар бес тежезвай шартIара, им, дугъриданни, важиблу кар я.
Жасмина Саидова
