Шамил Лахияловаз Ахцегьа «Легион» мектебдин филиал ачухиз кIанзава

Алай вахтунда Ахцегь районда спортдиз, акьалтзавай несилар спортдал рикI алаз чIехи хьуниз кьетIен фикир гузва. Жаванриз спортдин жуьреба-жуьреба хилерай чирвилер, вердишвилер къачудай мумкинвилер, къулай шартIар тешкилзава.

Эхиримжи кьве йисан къене Ахцегь районда футбол къугъвадай пуд майдан эцигнава. Алай вахтунда Цуругърин хуьрени футболдин майдан эцигунин кIвалахар акьалтIарзава. Муниципалитетдин пресс-къуллугъди хабар гайивал, и месэла райондин кьил Осман Абдулкеримова хсуси гуьзчивилик кутунва.

Мукьвара райондин кьил вичин заместитель М.Гъаниевахъ ва райондин депутатрин Собранидин председатель А.Палчаевахъ галаз санал эцигунар кьиле физвай объектдал фена. Санлай къачурла, О.Абдулкеримов тамамарнавай кIвалахрилай рази яз амукьна. Гьа са вахтунда райондин руководстводи Цуругърин хуьруьн администрациядин кьил Ш.Мердановал футболдин майдан лап мукьва девирда ачухуниз кьецI гузвай манийвилер арадай акъудун тапшурмишна.

***

И йикъара Ахцегь райондиз футболистар гьазурдай «Легион» тIвар алай мектебдин президент, виликдай «Анжи» командадин къугъвай Шамил Лахиялов мугьман хьанвай. Райондин кьил Осман Абдулкеримовахъ галаз кьиле фейи гуьруьшда ада вичихъ Ахцегь районда «Легион» мектебдин филиал ачухдай ниятар авайди лагьана.

О.Абдулкеримова пешекар футболистдин тереф хвена ва Ахцегьа жегьил футболистар битмишардай майдан кардик кутунин рекье вич куьмек гуз гьазур тирдакай хабарна.

«Лезги газет»