Шаирдин экуь къаматдиз бахшна

Алатай ислен юкъуз Каспийскда, Али Алиеван тIварунихъ галай Спортдин ва жегьилрин дворецда, Дагъустандин Кьил Рамазан Абдулатипован иштираквал аваз волейболдай итимрин командайрин арада 2017-йисан Россиядин Кубок патал акъа­жунрин виликамаз кьиле тухузвай паюнин къугъунар — “Дуствилин Кубок” лишандик кваз Вирироссиядин турнир-ачухуниз талукьарнавай шад мярекат кьиле фена. Къугъунар алай йисан 28-августдилай 3-сентябрдалди кьиле фида. Турнир Дагъустандин халкьдин шаир Расул Гьамзатован экуь къамат рикIел хкуниз бахшнава.

Акъажунар башламишдалди са шумуд югъ вилик РД-дин физический культурадин ва спортдин министерствода кьиле фейи совещанидал министр Мегьамед Мегьамедова къейд ­авурвал, республикада спортдин и жуьредин акъажунар кьиле тухузвай им сад лагьай сефер туш. Анал Дагъустандин спортдин зурба арена турнир кьиле тухуз гьазур тирдакайни хабар ганай.

Волейболдай чи регионда 4-сеферда кьиле тухузвай турнирдиз талукьарнавай шад мярекат РД-дин Кьил Рамазан Абдулатипова республикадиз атанвай командайриз ва болельщикриз салам гуналди ачухна.

— Спорт инсанрин, иллаки жегьилрин уьмуьрда физический ва руьгьдинни ахлакьдин, дуьзгуьн тербия къачунин рекьерай, гьакIни сагъламвал мягькемарунин жигьетдай важиблу  такьат я, — къейдна Р. Абдулатипова. — Чи республикада къе волейболдин еке сувар кьиле физва. Эхиримжи йисара чна ихьтин мярека­тар мукьвал-мукьвал кьиле тухузва. Чи республикадин командадини вичин агалкьунралди чун шадарзава. “Дагъустан” командадикай волейболдай итимрин командайрин арада Россиядин чемпионатдин кьилин лигада “Б” группадин чемпион хьана. Болельщикри волейболистар руьгьламишун ва хъсан къугъуналди командадини болельщикар шадарун важиблу я, — къейдна ада.

Гуьгъуьнлай шад мярекатдал школайра кIелзавай аялри Дагъустандин милли чIаларал Расул Гьамзатован шиирар еке устадвилелди кIелна. Хореографиядин “Дагъустан” ва “Лезгинка” госансамблри милли кьуьлер тамамарна.

Волейболдай “Россиядин Кубок” патал акъажунрин сергьят­ра аваз “Кузбасс” (Кемерово), “МГТУ” (Моск­ва), “Дагъустан” (Махачкъала), Газпром-Югра (Сургут)  командаяр къугъвана.

ИкI, “Дагъустан” командади “Газпром-Югра” ва “МГТУ”командайрин винел инанмишвилелди гъалибвал къазанмишна. Накь няниз, газет чапдиз вахкудай вахтунда, чи команда “Кузбасс” командадихъ галаз къугъун лазим тир.

Рагнеда Рамалданова