Сулейман-Стальский райондин кIвенкIвечивал патал шахматрай ачух турнир кьиле фена. Сифте яз тухузвай и турнир райондин спортдин, туризмдин ва жегьилрин крарай комитетди (директор Надыр Эфендиев), райондин образованидин управлениди (начальник Къачабег Аминов) тешкилнавайди ва Октябрдин ЧIехи инкъилабдин 100 йисан юбилейдиз талукьарнавайди тир.

Акъажунра  райондин 20 школадай ва Белиж поселокдин 4-нумрадин юкьван школадай атанвай 2-10-классра кIелзавай 92 гададини руша иштиракна.

Жаван шахматистрин къугъуниз ва алакьунриз килигиз Сулейман-Стальский райондин кьил Нариман Абдулмуталибов, райадминистрациядин жавабдар къуллугъчияр, общественный тешкилатрин руководителар, спортдин ветеранар атанвай.

Къизгъиндаказ кьиле фейи акъажунра 1-чка Белиж поселокдин 4-нумрадин юкьван школадин 9-классдин ученик Марсель Сефербегова кьуна.

2-кьве чкадиз Ислам Исабегов (Сайтархуьруьн умуми образованидин школа), Муслим Керимов (Кьасумхуьруьн 1-нумрадин юкьван школа), 3-пуд чкадиз Агъахан Агъаханов (ЦIийи Макьарин юкьван школа), Мирзехан Алибалаев (Кьулан СтIалрин юкьван школа) ва Сулейман Гьажиагъаев (Кьасумхуьруьн 1-нумрадин юкьван школа) лайихлу хьана.

Турнирда 1, 2 ва 3-чкаяр кьур спортсменриз райондин спортдин, туризмдин ва жегьилрин крарай комитетдин директор Надыр Эфендиева грамотаяр гана.

Н. Эфендиева къейдайвал, шахматрай райондин кIвенкIвечивал патал ачух турнир гележегда гьар йисуз тухуда.

Хазран Кьасумов