Агъзур йисарин тарих авай ва музейрин шегьер тир Дербентдин культурадин уьмуьрда и мукьвара генани лишанлу са вакъиа кьиле фена — ина кардик квай дуьньядин культурайрин ва динрин тарихдин музейда гьамишалугъ яз Санкт-Петербургдин динрин тарихдин госмузейдин векилхана шад гьалара ачухна.
Мярекатда Дагъустан Республикадин культурадин министрдин везифаяр вахтуналди тамамарзавай Зарема Бутаевади, Кьиблепатан Дагъустандин территориальный округда РД-дин Кьилин патай тамам ихтиярар ганвай векил Энрик Муслимова, намусдин азадвилин, динрин тешкилатрихъ галаз алакъа хуьнин рекьяй РД-дин комитетдин председателдин везифаяр вахтуналди тамамарзавай Мегьамед Абдурагьманова, Дербент шегьердин кьилин заместитель Мегьти Алиева, чи уьлкведин Кеферпатан меркездай атанвай мугьманри — динрин тешкилатрихъ галаз алакъаяр хуьнин рекьяй Санкт-Петербургдин губернатордин администрациядин отделдин заведующий Владимир Иванова, динрин тарихдин государственный музейдин директор Любовь Мусиенкоди, республикадин ва Дербент шегьердин культурайрин идарайрин, динрин тешкилатрин векилри иштиракна.
— Къе чна къадим Дербентдин музейда ачухнавай Санкт-Петербургдин динрин музейдин векилхана вичин итижлувилел гьалтайла уьлкведа лап чIехибурукай, важиблубурукай сад я, — къейдна мярекат ачухай ГМИР-дин директор Л.Мусиенкоди. — Ам Россия патал адетдинбур тир “Невадин къерехра Ислам”, “Христианвал” ва “Невадин къерехра буддизм” месэлайриз талукьди я. Ибурухъ галаз сад хьиз, Дагъустандин векилханадин программадик мектебрин муаллимар патал “Динрин культурайрин ва светский этикадин” курсни кутунва. Вичин рахунра Л.Мусиенкоди къадим Дербентдин, ина кардик квай дуьньядин культурайрин ва динрин тарихдин музейрин ва Санкт-Петербургдин музейдинни культурадин идарайрин алакъаяр генани гегьенш жедайдак умуд кутуна.
Зарема Бутаевади ва Энрик Муслимова чпин рахунра малумарайвал, Кеферпатан меркездин вири дуьньядиз машгьур музейриз килигдай, сиягьат ийидай мумкинвал, гьелбетда, гьар са касдихъ авач. Къе Дербентдиз Санкт-Петербург вич атанва. Тарихдин метлеб авай кар я.
— Дербент — вири дуьньяда лап къадим тарих авай ва Россиядин кьиблепатан шегьер я, — къейдна, мугьманар ва мярекатдин иштиракчияр тебрикуналди, Дербент шегьердин округдин кьилин заместитель М.Алиева.
Ина дуствилелди, стхавилелди ва сада-садаз гьуьрметуналди 30 миллетдин векилар яшамиш жезва. Динрал гьалтайлани абурун арада садрани чуьруькар, наразивилер хьайиди туш. Санкт-Петербургдин машгьур музейдин векилхана ачухуни, са рахунни алачиз, шегьердин культура мадни гегьеншдиз раижда, халкьарин дуствал мягькемарда.
Эхирдай чи республикадин культурадин министерстводин, Динрин тарихдин (Санкт-Петербург), Дуьньядин культурайрин ва динрин тарихдин музейрин (Дербент) арада икьрар кутIунна.
Нариман Къарибов
