Ноябрдин гуьлуьшан йикъар. Зулун гуьзел гьа и береда Мегьарамдхуьруьн районда “Самурдин зул” лишандик кваз халкьдин яратмишунрин республикадин фестиваль кьиле фена.
Лезгинстанда цIи вад лагьай сеферда кьиле фейи зулун суваррик Мегьарамдхуьруьн райондин кьил Фарид Агьмедова, Дагъустан Республикадин культурадин министрдин заместитель, Республикадин халкьдин яратмишунрин кIвалин директор Марита Мугадовади, идарайрин регьберри, самбар районэгьлийри иштиракна. Кар алайди вуч я лагьайтIа, фестивалдиз Дагъустандин гзаф районрайни шегьеррай яратмишунрин коллективар, халкьдин манияр лугьудай устадар атанвай.
Зулун гьихьтин сувар хьурай чкадин хсуси майишатрай кIватI хъувунвай бегьерар алай ярмарка галачир. Россиядин халкьарин адетдин культурадин центрадин вилик квай гьаятда райондин майишатрин, культурадин идарайрин, умуми образованидин школайрин кIелунинни ахтармишунрин участокрин, райондин искусстводин школадин, аялрин яратмишунрин центрадин векилри итижлу майданар ачухнавай. Ина гьар жуьре яр-емиш маса къачудай, яратмишунрин жуьреба-жуьре композицийрихъ галаз таниш жедай мумкинвал авай.
Мегьарамдхуьруьн районда кардик квай, Дагъустанда чIехибурукай сад тир къушарин “Гуьней” фабрикади, балугъар туьретмишзавай “Булах” майишатди ва районда кIвалахзавай хуьруьн майишатдин кооперативри чпин продукция ярмаркадиз акъуднавай.
Гьар са майдандин агалкьунрихъ галаз райондин кьил Фарид Агьмедов ва райадминистрациядин маса къуллугъчияр таниш хьана. Ф.Агьмедова райондин экономикадин хел вилик тухунин карда хуьруьн майишатдик, халкьдин адетар, ацукьун-къарагъун, милливал хуьн патал яратмишунрин коллективрик ва кьилди ксарик умудар кутазвайди къейдна ва абуру мадни гзаф чалишмишвилер авун патал райадминистрациядини куьмекар гудайди малумарна.
“Самурдин зул” фестиваль ачухдалди вилик Фарид Агьмедова вири мугьманар ва суварин иштиракчияр Мегьарамдхуьруьн райондин чилел тебрикна ва цIи и мярекатар Халкьдин садвилин суварин вилик къейдунин лишанлувиликай рахана.
— Халкьдин яратмишунрин “Самурдин зул” фестивалди чи халкьарин мани-макьамдин культура хуьник, виликди тухуник еке пай кутазва, чун садзава, сада-садахъ галаз тежрибадикай суьгьбетардай мумкинвал жезва. Миллетдилай ва инанмишвалзавай диндилай аслу тушиз чна вирида аннамишун лазим я хьи, чун вири сад тир тарих, кьисмет, гележег авай халкь я. Гележегда чи уьлкведи цуьк акъудун патал халкьарин садвал кар алай шартI я, — лагьана Фарид Агьмедова.
Марита Мугадовади фестивалдин иштиракчийрив, райондин кьилив ва райондин культурадин хиле кIвалахзавайбурув РД-дин культурадин министрдин везифаяр вахтуналди тамамарзавай Зарема Бутаевадин патай саламар агакьарна.
“Мегьарамдхуьр” ансамблди кьуьл авунилай фестивалдин кьвед лагьай пай башламиш хьана. Мегьарамдхуьруьн, Ахцегь, Сулейман-Стальский, Докъузпара, Хив, Ботлих, Къаякент, Агъул районрин, Дагъустандин Огни шегьердин яратмишунрин коллективри манияр лугьуналди, кьуьлер авуналди, чпин алакьунар къалурна. Мегьарамдхуьруьн симинин пагьливанрин “Гьунар” тIвар алай халкьдин коллективди фестивалда кьетIен чка кьазвай.
Гьазурайди — Дагъви Шериф
