Лезгийрин СтIал Сулейманан тIварунихъ галай  госмуздрамтеатр и йикъара “Самурдин авазар” тамаша-концертдин чIехи программа гваз Кьасумхуьрел мугьман хьана.

Ам чи классик шаир Алирза Саидован 85 йисан юбилейдиз талукьарнавайди тир. “Самурдин авазриз” тамашиз  Сулейман-Стальский  райондин кьил Нариман Абдулмуталибов кьиле аваз райондин администрациядин, депутатрин собранидин, идарайринни общественный тешкилатрин жавабдар къуллугъчияр, Алирза Саидован яратмишунрал рикI алайбур атанвай, Культурадин дворецдин чIехи зал сиве-сивди ацIанвай.

Сегьнедиз театрдин художественный руководитель, РД-дин халкьдин артист Мирзабег Мирзабегов, театрдин директор Динара Эминова экъечIна, абуру Алирза Саидован бажарагълувиликай, уьмуьрдин рекьикай, адан къелемдикай хкатай ктабрикай, руьгьдин милливиликай, ватанпересвиликай, ада яратмишай гуьзел чIалари­кай метлеблу рахунар авуна.

Тамаша-концертдин программа РД-дин лайихлу артист Руслан Пирвердиева (ада са шумуд манини та­мамарна) ва театрдин актриса Наз­и­фа Агъасиевади кьиле тухвана.

Сад-садан гуьгъуьналлаз сегьнедиз РФ-дин лайихлу артист Абдулагь Гьабибов, РД-дин халкьдин артистар Фаризат Зейналова, Зерифа Къухмазова, РД-дин лайихлу­ артистка Миясат Мурадханова, артистар тир Эмина Вагьабова, Эльмира Къараханова, Фатима Фейзулаева, Валерик Сулейманов, Зейнаб Заирбегова, Амалия Керимова, Гьемзебег Эмиралиев экъечI­на, абуру Алирза Саидован чIала­риз кхьенвай манияр лагьана, адаз бахшна маса шаирри кхьенвай эсерар кIелна, “Гъуьлуьн диде” ва маса сегьнеяр къалурна.

“Самурдин авазар” Сулейман-СтIальский райондин агьалийриз гзаф бегенмиш хьана.

Хазран Кьасумов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя