Сагърай, духтурар!

КIвачерин жалгъайрин, ивидин дамаррин ва маса ­азарри гьелекзавай зун и мукьвара Махачкъаладин 2-­нумрадин больницадин сочетанный патологиядин от­деленидиз аватна.

Ана зал, гьа зун хьиз, сагъсуз яз иниз акъатнавай  Нелля  Даниловна  Гьажиханова гьалтна. Абурун хизанар Герейханован совхоздал яшамиш хьайи­бур я.

Кьведни чун, хайи вахар хьиз, отделенидин заведующий, лап къени инсан, устад духтур, ахцегьви Расим  Рагьимович  Рамазанова кьабулна.

Адахъ галаз сад хьиз, кьилин пешекар духтур  Мегьамед-Салам  Жамбулатович,  анестизиолог Закир  Насрудинович, отделенидин вири медперсонал (чаз абурукай хкуддайди жагъизвач) чи къуллугъда акъвазна.

Авайвал лугьун, зун гзаф чкайра хьайиди я, амма ина хьтин къулайвал, къайгъударвал, къени рафтарвал заз санани акурди туш…

Инай чун, герек тир вири жуьредин куьмекар хьана, дири яз, шаддиз хъфизва.

Газетдин чинилай чаз ихьтин гъил кьезил, рикI михьи, руьгь хци, чирвилериз дерин вири духтурриз сагърай лугьуз кIанзава.

Къуй инсанвилин къадир авай гьар са хва-руш Аллагьди хуьрай, шад хьурай, бахтаривди ацIурай.

ЧIехи гьуьрметдалди, Герейханован совхоздин 1-нумрадин юкьван школадин муаллим,
Президентдин грантрин сагьиб Сегьерханум Османова, и хуьруьнви
Нелля Гьажиханова.