Са шумуд югъ идалай вилик Махачкъалада кьиле фейи “Жегьре рангунин лент” серенжемдин сергьятра аваз 300-далай виниз дишегьлийриз некIедин железайрин УЗИ, маммография ийидай, хурарин ракдин азар квани-квачни чирдай, гьакIни маммологдин меслятар къачудай мумкинвал хьана. ИкI, чпин сагъламвал ахтармишиз кIанзавай ксариз и юкъуз пулсуздаказ ва духтурдин направление гвачиз некIедин железа авай гьал ахтармишдай шартIар тешкилнавай. Серенжемдин сергьятра аваз медицинадин работникрини сагъламвал ахтармишна. Чпин чешнедалди лацу халатар алайбуру вири дишегьлийриз сагъламвал ахтармишуниз эвер гана ва вахтунда азар дуьздал акъудунин важиблувилел фикир желбна.
Къейд авун лазим я хьи, и жуьредин серенжем республикада кьиле тухвай сад лагьай сефер туш. Дагъларин уьлкведин меркездин духтурри-маммологри вири Россияда кьиле физвай серенжемрик гьар гъилера чпин пайни кутазва. Дишегьлияр рак азардик начагъ хьунал гьалтайла некIедин железадин ракди сад лагьай чка кьазва. Медицина санал акъвазнавачтIани, ада дурумлудаказ виликди камар къачузватIани, инсан кьиникьал гъизвай рак азардин вилик пад кьадай ва я адакай чара аквадай дарман гьелелиг авач. И азардик начагъ жезвай дишегьлийрин кьадар йисалай-суз артух жезва. Гьаниз килигна, и жуьредин серенжемрин макьсад чи вахари, рушари, дидейри чпин сагъламвилин иесивал авун рикIелай ракъур тавун я. Беденда чIуру азар пайда хьайивалди ам дуьздал акъудай 98 % дуьшуьшра инсан сагъариз жезва.
— Гьайиф хьи, азар акатнавайди геж чир хьайи дуьшуьшра инсан ажалдин къармахрай акъудиз жезвач. Гьаниз килигна, гьар са дишегьлидиз хурарин ракдин сифте лишанар гьибур ятIа чир хьун ва гьар сада вичин хурарин сагъламвал йиса садра кьванни ахтармишун лазим я. Азардикай вахтунда хабар хьайила, адан вилик пад кьун регьят я, -къейдна вичин рахунра РД-дин Минздравдин дидедиз ва аялриз медицинадин куьмек тешкилунин отделдин начальник Раиса Шагьсиновади.
Меркезда “Жегьре рангунин лент” серенжемдин сергьятра аваз ахтармишай дишегьлийрикай 90 процентдиз и ва я маса татугайвилер (чIехи паюниз — мастопатия азар), кьве дишегьлидиз лагьайтIа, ракдик азар авайди винел акъудна.
Чи мухбир
