Кьурагь райондин  сайтда хабар ганвайвал, алай йисан 20-майдиз КьепIиррин хуьре азаддаказ кьуршахар кьунай жаванрин арада кIвенкIвечивал къазанмишун патал, спортсмен, жавабдар къуллугърални хьайи Фикрет Асланован экуь къамат рикIел хкуниз талукьарна, республикадин дережада аваз акъажунар кьиле фена. Ана Кьиблепатан территориальный округдик акатзавай районрай, гьакIни республикадин шегьеррай тир 16 командадик кваз 275 спортсменди заланвилин 11 категориядай чпин устадвал ва алакьунар къалурна.

Турнирдин кьилин тешкилатчи спонсор, Ф.Асланован хтул, алай вахтунда Москвада яшамиш жезвай Огтай Асланов, тешкилиз куьмекар гайибурни  “Кьурагь район” МО-дин  физический культурадин, спортдин ва жегьилрин крарин рекьяй отдел, Аслановрин хизан  ва масабур тир. Турнир вини дережада аваз тешкилун патал Огтай Асланова лазим вири тадаракар маса къачунвай, судьявал авун патал кьуршахар кьунин жуьредай международный категориядин судья Муъмин Гъаниев кьиле аваз судьяйрин коллегиядиз эвер ганвай. Турнирдин багьа мугьманрин арада Олимпиададин чемпион, РД-дин физический культурадин ва спортдин министрдин заместитель Гь.Гьайдарбегов, азаддаказ кьуршахар кьунай дуьньядин чемпион Къ.Къурамегьамедов, чи машгьур спортсменар Эльдар Гьасанов, Даурен Куругълиев, Альберт Селимов, Велимурад Алхасов, Рагьим Алиев, Замира Рагьманова ва гзаф масабур авай.

Акъажунар ачухуниз талукьарнавай шад мярекатдал рахай “Кьурагь район” МО-дин  кьил Замир Азизова, Фикрет Асланован хва Эльмар Асланова, стха Аскер Асланова ва масабуру Фикрет Асланован уьмуьрдин ва зегьметдин рекьикай, спортда хьайи  агалкьунрикай суьгьбетна. Яргъалди ва итижлудаказ кьиле фейи бягьсерин нетижайриз тамашна, гъалиб хьайи спортсменар тайинарна. КIвенкIвечи чкаяр кьур вирибуруз медалар, гьуьрметдин грамотаяр, пулдин пишкешар гана. Къейд авун лазим я хьи, мукьвара Европадин чемпионвилин тIварар къазанмишай Д.Куругълиеваз ва М.Зингароваз турнирдин кьилин спонсор Огтай Асланован патай пулдин пишкешар гана.

Турнирдин фонд 2 миллион манатдилайни виниз тир.

Цуьквер  Рамазанова