Мегьарамдхуьруьн райондин Уружбайрин хуьре мискIин эцигиз гатIуннава. Муниципалитетдин администрациядин пресс-къуллугъди хабар гузвайвал, эцигунриз пулдин такьатар райондин кьил Фарид Агьмедова чара ийида.
8-октябрдиз Уружбайрин хуьре мискIиндин къандахда сад лагьай къван туниз талукьарнавай мярекат кьиле фена. Ана Фарид Агьмедова, Дагъустандин Муфтийдин везифаяр вахтуналди тамамарзавай Абдулла Аджимоллаева, намусдин азадвилин, диндин тешкилатрихъ галаз алакъаяр хуьнин рекьяй Комитетдин председатель Мегьамед Абдурагьманова, Кьиблепатан Дагъустанда РД-дин Муфтийдин патай тамам ихтиярар ганвай векил Магьди Абидова, Махачкъаладин, Дербентдин, Мегьарамдхуьруьн мискIинрин имамри, Мегьарамдхуьруьн райондин имамрин Советдин председатель Фикрет Мегьамедова, райондин бщественный палатадин председатель Агъадаш Нагъметуллаева ва масабуру иштиракна.
Фарид Агьмедова къейд авурвал, Уружбайрин хуьре мискIин хьун адан рагьметлу бубадин мурад тир. “Аллагьди гайитIа, за адан мураддиз экуь дуьнья къалурда. Заз гьакIни мискIин эцигун патал чил чара авур Москвада яшамиш жезвай уружбави Раид Насировичаз, къенин мярекатда иштиракзавай мугьманриз, хуьруьн агьалийриз сагърай лугьуз кIанзава”, — алава хъувуна райондин кьили.
Мярекатдин сергьятра аваз, Магьди Абидова Фарид Агьмедовав, райондин кьилин заместитель Зайнуддин Азимовав ва Уружбайрин хуьруьн кьилив, савкьатар яз, ктабар вахкана.
«Лезги Газет»
