Алатай гьафтеда Кьиблепатан территориальный округда РД-дин Кьилин патай тамам ихтиярар ганвай векил  Энрик  Мусли­мов  Мегьарамдхуьруьн райондин активдихъ галаз гуьруьшмиш хьана, — хабар га­­на Мегьарамдхуьруьн райондин ад­ми­нистрациядин пресс-къуллугъди. И мя­ре­катда райондин жавабдар руково­ди­телри,­ хуьрерин кьилери, райондин Соб­ранидин депутатри, къенепатан крарин органрин къуллугъчийри, общественный, диндин, же­гьилрин тешкилатрин векилри ишти­ракна­.

Мярекат ачухай Мегьарамдхуьруьн райондин  кьил Фарид  Агьмедова  мугь­ман тебрикна ва районда эхиримжи йисара экономикадин, яшайишдин  рекьяй  вилик фин патал кардик кутур проектрикай, хуьруьн майишатда, спортда къазанмишнавай агалкьунрикай куьруьдаказ ихти­латна.

Ахпа Ф.Агьмедова  гаф  Энрик  Мусли­моваз  гана. КIватI хьанвайбуруз ада вичин къуллугъдин везифайрикай, кьилиз акъудна кIанзавай крарикай лагьана. Ада Кьиблепатан Дагъустанда кьиле физвай мярекатрикай СМИ-рай  агьалияр хабардар авунин важиблувални къейдна.

Э.Муслимова “Экономика экуь авунин” проектдин сергьятра аваз гъвечIи карчивал ви­лик тухунин месэлаяр веревирдна, гьа гьи­сабдай яз Самурдин водоводдин ва “хъендик квай экономика” дуьздал акъудунин месэлаярни. Идалай гъейри, ам алай вах­тунда Кьиблепатан Дагъустанда туризм вилик тухунин ва федеральный рекьер, абурун къерехар къайдадик кваз хуьнин месэлайрални акъвазна. Адан гафаралди, туризмдин рекьяй Из­бербаш шегьерда тешкилдай центради и хел вилик тухуниз куьмекда­.

Гуьруьшдал райондин Общественный палатадин  председатель  Агъадаш  Нагъ­метуллаев, РД-дин ФОМС-дин Мегьарамдхуьре авай филиалдин директор Юнус  Балабегов рахана. Абуру чеб важиблу месэлаяр гьялунин карда Э.Муслимова райондиз куьмекар гудайдахъ инанмиш тирди малумарна.

А.Нагъметуллаева мугьмандин фикирдиз налогриз талукь месэла гъана. РФ-дин ФСБ-дин Мегьарамдхуьре авай   пограничникрин къуллугъри налогар райондин бюджетдиз ракъурзавач. И месэладал кIукI гъун  патал А.Нагъметуллаева  полпреддивай куьмек тIалабна. Ада налогар кIва­тIу­нин месэла районда кьетIен гуьзчивилик квайдини къейдна.

Мярекатдал районда медицинадин рекьяй ерилу шартIар тешкилунин месэлани къарагъарна.  Кьилди къачуртIа, райондиз  алай аямдин истемишунриз жаваб гудайвал тадаракламишнавай поликлиника чарасуз герек тирдакай лагьана.

Эхирдай  Энрик Муслимова  республика­ вилик тухунин мураддалди кар алай про­­ектар уьмуьрдиз куьчуьрмишна кIан­завайди къейдна.

Ф.Агьмедова мугьмандиз сагърай лагьана ва ихьтин гуьруьшри вилик эцигзавай везифаяр кьилиз акъудунин карда куьмек гудайди малумарна.