Гьар йисуз эпидемиологиядин сезон башламишдалди вилик Россияда хьиз, Дагъустандани агьалийриз гриппдин рапар ягъунин кампания кьиле физва. Малум тирвал, вахтунда рапар ягъун гриппдин вилик пад кьунал гьалтайла виридалайни нетижалу серенжем я.
Алай вахт рапар ягъун патал лап кутугайди я, вучиз лагьайтIа иммунитет арадал атун патал 8-12 югъ герек я. Пешекарри къейдзавайвал, гриппдиз акси раб янавайбур гриппдик азарлу хьунин дережа кьве сеферда агъузарзава. Эгер акатайтIа, ам кьезилдиз, яни бедендиз зарар тахьана алатда.
Роспотребнадзордин Дагъустан Республикада авай Управленидай хабар гайивал, 2017-2018-йисарин эпидемиологический сезонда гриппдиз акси рапар ягъун пландин бинедаллаз кьиле физва. Къалурнавай вахтунда республикада 1 миллионни 122 агъзур касдиз рапар ягъун планламишнава. Гриппдиз акси рапар сифте нубатда ядай ксарин арада ава: медицинадин къуллугъчияр, яшар 60-далай алатнавай ксар, зур йисалай алатнавай куьрпеяр, 1-11-классра кIелзавай аялар, студентар, аялдик квай дишегьлияр ва гзаф масабур. Къенин юкъуз 575 агъзурдав агакьна дагъустанвийриз гриппдиз акси рапар янава (и рекъемди рапар ягъун пландик кутунвайбурун 51 процентдилай гзаф тешкилзава) ва и кар давам жезва.
Къейд авун лазим я хьи, Роспотребнадзордин РД-да авай Управлениди гриппдиз акси рапар ягъунихъ галаз алакъалу яз “Тадиз хабардай линия” кардик кутунва. Алай йисан 2-октябрдилай 16-октябрдалди агьалийривай телефондин агъадихъ галай нумрайриз зенг ийиз жеда: 8 (8722) 69-03-64 ва 69-19-52. Абуруз пешекарри меслятар гуда: раб ягъуниз гьазур хьуниз, гриппдиз акси раб амай прививкайрихъ галаз ягъуниз, аялар гриппдикай хуьниз талукь яз ва икI мад.
ИкI, винидихъ тIвар кьунвай управленидин делилрал асаслу яз, алай вахтунда республикада гриппдик ва ОРВИ-дик начагъ хьунихъ галаз алакъалу яз эпидемиологиядин гьалар писбур туш.
Рагнеда Рамалданова
