Мегьарамдхуьруьн райондин Советский хуьруьн агьали  Мегьемедали  Зейналов  1947-йисан 13-июндиз дидедиз хьана. Буба Ме­гье­медали ам жедалди рагьметдиз фе­на. Диде Саибат пуд аял гъилел алаз хендеда хьана. Дяве куьтягь хьана кьве йис алатнавайтIани, абуруз дарвили лап басрух гузвай, ая­лар лагьайтIа, кIелер хуьнизни къабил хьанвачир. Вири четинвилер дидедал гьалтнавай.

Ахцегь райондин Ялцугърин хуьр 1952-1953-йисара арандиз куь­­чарна, Саибата вичин пуд аялни галаз Советский хуьре  ери-бине кутуна.

1965-йисуз хуьруьн школа куьтягьай Мегьемедали совхоздиз кIвалахал фена. Анайни ам военкоматди шофервилин курсариз ра­къурна. И курсара  ада  шофервилин пешедихъ галаз санал тракториствилин пешени чирна.

1966-йисан ноябрдиз Мегьемедали Ватандин вилик вичин пак бур­жи кьилиз акъудиз армиядиз фе­на. Сифте жегьил аскер Украинадин Житомирский областдин Новоград-Волынский шегьердиз акъатна. Ина адакай самолетрин рекьяй пешекар гьазурна. Анай ам Мукачево шегьердиз ракъурна. Адакай Чехословакиядин вакъиайрин иштиракчини хьана.

— 1968-йисан 15-августдиз чи полкуниз дяведиз гьазур хьунин буйругъ га­на. Са куьруь вахтунда чна самоле­тар ремонт хъувуна. Чна, югъ-йиф талгьана, аэродромдал кIвалах­завай. Гьарда вичин везифа жавабдарвал хиве аваз намуслувилелди кьилиз акъуднай. За урус Гриша­дихъ галаз кIвалах­завай. Самолетда кьве генератор авайди я. Зи везифа генераторар къайдадик кухтун тир. И карни за авуна, — рикIел хкизва М.Зейналова. — Гуьгъуьнлай вири полк акъвазарна, полковникди аскерриз, офицерриз тайинарнавай вахтундилай вилик чарасуз кIвалахар кьилиз акъудунай чухсагъул малумарнай. Заз лагьайтIа,  дидедал кьил чIугун патал 10 югъ ганай, — дамарзава суьгьбет М.Зейналова.

— Квез куьн  гьиниз гьазур жез­ватIа чизвайни?

— Ваъ 1968-йисан 20-августдиз чи самолетар Чехословакиядиз рекье тунай ва ана кьиле физвай вакъиайра иштиракунин гьакъиндай чун хабардарнай. Гьа икI, чна уьлкведин Зволен шегьерда пуд вацра къанун-къайда хвена, интернационалиствилин пак буржи кьилиз акъудна. Анай хтайла зун отпускдизни ракъурнай. Хъуь­тIуьн вахт тиртIани, дидедиз хейлин куьмекар ганай. Чехословакияда хьайидакай чна садазни лагьаначир.

1969-йисан гатуз  армиядай хтай жегьил “Фрунзенский” совхоздин  директордин патав кIвалах тIалабиз фенай. Адав совхоздин мал-къарадихъ гелкъвезвай духтурдин ихтиярда авай машин ва цан цадай трактор вуганай. М.Зейналов са кIва­лах­дивайни къерех жедачир. Ада вичел тапшурмишай крар ерилудаказ, намуслувилелди кьилиз акъуд­дай.

1971-йисуз Мегьемедалиди гьа вич хьтин зегьметдал рикI алай Гьамидедихъ галаз кьисметар сад авуна. Саибат дидеди хциз гурлу ме­хъер­на. Мегьемедалини Гьамиде санал яшамиш жез 46 йис тамам хьанва. Абуру арада гьуьрмет, хатур, кIанивал авай туькIвей хизан тешкилна, вад аял — кьве хвани пуд руш — тербияламишна. Абурухъ ви­ридахъ кIвал-югъ ава. ЧIехи руш Заради Дербентдин педучилище куьтягьна, Алмаядини Гуьльнаради­ кьилин образование къачуна. Зейнала — Омск шегьерда нафтIа­дин­ни газдин институт акьалтIарна Тюменда инженервиле, Заурани вичин стхадихъ галаз ина буругъчивиле кIвалахзава.

Мукьвара 70 йисан юбилей къейд­завай М.Зейналовахъ чандин сагъвални яргъи уьмуьр хьун чи мурад я.

Ферид  Вагьабов