ЦIийи йис алукьдалди са тIимил вахт амаз ва йисакай алатнавай йикъарани “2017-йисуз хьиз, цIини пенсионерриз 5 агъзур манат гунин малумат дуьзди яни?
Ам гун патал гьихьтин справкаяр агакьарун лазим я?” лугьуз хабарар кьазвай чарар-цIарарни зенгер “Лезги газетдин” редакциядиз гзафбуру рекье тунва. Идалайни гъейри, социальный сетра “Алай йисуз гьар са пенсионердиз, са сеферда гудай пул яз, 5 агъзур манат вахтунда, яни 20-январдалди, лазим справкаяр агакьар тавурбуруз гузвач” лугьудай видеороликарни гзаф гьатнава. Ял ядай йикъар алатна, мумкинвал хьанмазди, чна РФ-дин пенсийрин фондунин кьилин управленидин (ГУ ОПРФ) Дагъустанда авай отделенидин пресс-къуллугъдин регьбер Альбина Фаргьатовна Сункъулиевадивай и суалриз жавабар, баянар гун тIалабна. Чи ватандаш руша гзаф кьадар пенсионеррин вил алай тIалабун гьасятда кьилиз акъудна.
— Малум тирвал, алукьнавай йисуз Россиядин, гьа гьисабдай яз Дагъустандинни пенсийрин къурулушда са жерге цIийивилер арадал къведа. Кьилди къачуртIа, абур алай вахтунда пенсионерар тир ва гележегда пенсиядиз экъечIдай ксаризни талукьбур я. ИкI, 2018-йисан 1-январдилай кIвалах тийизвай пенсионеррин, яни 554 агъзурни 428 дагъустанвидин пенсия 3,7 процентдин хкаж хьанва, — къейдна А.Сункъулиевади. — Хкаж хьанвай кьадар пул 2017-йисан пул къуватдай аватунин (инфляция) делилрилай артух я. Индексация кьиле тухвайдалай кьулухъ, фиксированный выплатадин (пенсиядин са пай, пенсия тайинарнавай касдин страховой пенсиядал алава хъийизвай пулунин кьадар) кьадар вацра 4982,9 манат, пенсиядин са баллдин къиметни 81, 49 манат (2017-йисуз -78, 58 манат) хьанва. Нетижада алай йисуз яшарив агакьайла гузвай страховой пенсиядин йисан юкьван гьисабдин кьадар 14 075 манатдив, кIвалах тийизвай пенсионеррин — 14 329 манатдив агакьда. Алай йисан 1-апрелдилай кIвалахзавай ва кIвалах тийизвай ксарин пенсияр 4,1 процентдин мадни хкаж жеда. Нетижада яшайишдин пенсиядин йисан юкьван гьисабдин кьадар 9 045 манатдив агакьда. Идалайни гъейри, инвалид аялрин ва аял чIавалай I группадин инвалидар тир аялрин яшайишдин пенсиядин йисан юкьван гьисабдин кьадарди 13 699 манат тешкилда, — алава хъувуна Альбина Фаргьатовнади.
А.Сункъулиевадин гафарай мадни малум хьайивал, 2018-йисан августдиз Дагъустандин Пенсийрин фондуни гьар йисуз кьиле тухун адетдиз элкъвенвай, 2017-йисуз кIвалахай пенсионеррин страховой пенсиядин кьадар туькIуьр хъийида. Идалайни гъейри, 2018-йисан 1-февралдилай федеральный льготникрин ЕДВ (гьар вацра гузвай пулдин кьадар) тахминан 3,2 процентдин хкажда.
Гьуьрметлу “Лезги газет” кIелзавайбур! Чи суалриз гайи жавабрай аквазвайвал, пенсияр артухарнава. Амма пенсионерриз са сеферда гудай пулуникай (5 агъзур манат) ванер-сесер бине авачирбур я.
Рагнеда Рамалданова
