21-майдиз Сулейман-Стальский райондин Зизикрин хуьре кьиле фейи диндин межлисда Кьиблепатан Дагъустанда РД-дин Муфтиятдин патай тамам ихтиярар ганвай векил Магьди Абидова, Зизикрин, Сардархуьруьн, Экенрин мискIинрин имамри — Мегьамеднаби Сафаралиева, Абдулла Садикьова, Эрзиман Расулова, Сулейман-Стальский районда “Ас-салам” газетдин векил Мегьамед Гьажимирзоева, чкадин агьалийри иштиракна.
Мярекат райондин имам Гьасан Амаханова кьиле тухвана.
Магьди Абидова, межлисдин иштиракчияр РД-дин муфтий, шейх Агьмад Абдуллаеван тIварунихъай тебрикуналди ва виридаз алукьзавай Рамазандин варз мубаракуналди, и пак вацран кьетIенвилерикай суьгьбетна. Ам вичин рахунра Исламдин дибрал, истемишунрал, Аллагьди мусурманриз тайинарнавай къайдайрал акъвазна, акьулбалугъ хьанвай гьар са касди абурал амал авун чарасуз тирди къейдна.
Межлисдин сергьятра аваз рахай диндин маса векилрини мергьяматлувиликай, Аллагьдин берекатрикай, мусурманрин хиве авай буржийрикай, ахлакьдикай гегьеншдиз ихтилатар авуна.
