Ватандин ЧIехи дяведин йисара Сулейман-Стальский райондин Чантархуьряй фронтдиз 31 кас фенай. Абурукай анжах 17-даз Гъалибвал къачуна Ватандиз хтун кьисмет хьанай. Къе гьа кьегьалрикай са касни амач, чантархуьруьнвиярни АгъастIалрин-Къазмайрал ва масанриз куьч хьана. Куьгьне хуьре садни яшамиш жезвач.

Ватандин азадвал патал чанар гайи ва гуьгъуьнлай рагьметдиз фейи чантархуьруьнвияр-вете­ранар акьалтзавай несилрин векилри рикIелай ракъурзавач. ИкI, и хуьруьнви, къайдаяр хуьдай органрин ветеран Куьребег Эскендарова кьил кутуналди, Чантархуьре ветеранар рикIел хуьнин лишан яз обелиск эцигна, и йикъара ам шад гьалара ачухна. Мярекатда райондин кьилин сад лагьай заместитель Ла­цис Оружева, общественностдин, ветеранрин организацийрин, СМИ-рин векилри, патарилай хтанвай чантархуьруьнвийри иштиракна.

Обелиск ачухунин мярекатдал Лацис Оружев, Испикрин поселенидин кьил Руслан Магьмудов, райондин зегьметдинни дяведин ветеранрин Советдин председатель Абдулаким Гьажимурадов, хуьруьнвияр тир Алимат Баламирзоева, Аливерди Муртузалиев, Расул Расулов, обелиск эцигуник еке пай кутур Куьребег Эскендаров, писатель Нажмудин Шихнабиев рахана, Шихидхуьруьн ва Асалдхуьруьн юкьван школайрин аялри шиирар кIелна, манияр лагьана.

Гуьмбет ачухунин лишан тир яру лент атIунин ихтибар Лацис Оружеваз, Руслан Магьмудоваз ва Куьребег Эскендароваз авуна.

Хазран Кьасумов