Дагъустандин физический культурадин ва спортдин министрдин везифаяр вахтуналди тамамарзавай Мегьамед Мегьамедов журналистрихъ галаз гуьруьшмиш хьана. Халкь республикадин спортдин уьмуьрдикай, министерстводин кIвалахдикай хабардар авунай СМИ-рин векилриз сагърай лагьайдалай кьулухъ журналистри къведай йисуз кьуршахар кьунай Каспийскда Али Алиеван тIварунихъ галай Спортдин ва жегьилрин дворецда кьиле фидай Европадин акъажунриз гьазур хьуниз талукь суалар гана.
— Инанмишвал авуналди лугьуз жеда хьи, кьуршахар кьунин пуд жуьредай Европадин и чемпионат идалай вилик йисара республикада кьиле фейи спортдин мярекатрикай виридалайни чIехиди, зурбади жеда. Гьазурвилер чна еке жавабдарвилелди аквазва. Чемпионат кьиле фидай чка чи хийирдиз тайинарай гьа сифте йикъара тешкиллувилин оргкомитет тешкилна. Гьазурвилер пландив кьурвал кьиле физва. Чемпионатдин сайт кардик кутунва. Ана акъажунрин иштиракчияр, къведай делегацияр ва вири мугьманар патал, сифте нубатда, билетриз, мугьманханайра ва отелра яшамиш жедай чкайриз, аккредитацийриз, акъажунрин программадиз талукь месэлайрай делилар ава. Къейд ийиз кIанзава, акъажунрин иштиракчияр патал виридаз Каспий санаторийда чкаяр жеда. Гьуьлуьн къерехдал алай ана спортсменар яшамиш хьун ва абуру тренировкаяр авун патал вири шартIар арадал гъида. И мукьвара санаторийдиз ва Али Алиеван тIварунихъ галай дворецдиз кьуршахар кьунай виридуьньядин федерациядин членар фенвай. Чкайрихъ галаз таниш хьайидалай кьулухъ чна абур чемпионат Дагъустанда кьиле тухун дуьшуьшдин кар туширдахъ инанмишарна ва ам виридалайни хъсандиз, рикIел аламукьдайвал кьиле фидайди лагьана, — жаваб гана М.Мегьамедова.
ЦIи эцигнавай ва идалай кьулухъ эцигун пландик квай спортдин объектриз талукь суалдиз жаваб яз М.Мегьамедова лагьана: “20 октябрдиз алай аямдин физкультурадинни сагъарунин комплекс ачухна. Санлай къачурла, адан къимет 153 млн манат я. Ам физический культура ва спорт вилик тухунин федеральный ва республикадин госпрограммайрай эцигнава. ЦIийи дараматда чи ДЮСШ-ни жеда. Виликрай анин тербиячийри “КЭМЗ-дин” залра тренировкаяр ийизвай. Гила абурухъ чпин кIвал хьанва. Гьа ихьтин ФОК чаз къведай йисуз Буйнакскдани эцигиз кIанзава.
ГьакIни исятда чна Махачкъаладин патав Каспий гьуьлуьн къерехда спортдин жуьрейрай хкягъай командаяр олимпиададиз гьазур хьунин Центрани эцигзава. Центр идалай вилик авай спортдин объектдин бинедаллаз эцигзава. Виликрай ам “Анжидин” ФК-дин кIелунинни тренировкайрин база хьиз ишлемишзавай. Алай вахтунда чIехи майдандал спортсменар патал мугьманханайрин комплекс, спортдин кьве зал эцигна куьтягьзава. 6 гьасир гьакьдай са зал азаддиз ва грекринни римлуйрин жуьреда кьуршахар кьадайбур, кьвед лагьай зал кьилди дзюдоистар патал я. Алава яз центрада сирнавдай еке бассейн, футболдин майдан, тренажёррин зал, воркаут-майдан, массаждин кабинетар, парилкаяр, ДЮСШ ва ял ядай чкаяр, багъ жеда.
Кар алай маса объектрин арада Махачкъалада Жуьмя мискIиндин патав спортдин универсальный комплекс эцигун ава. Малум тирвал им фадлай эцигиз башламишнавай дарамат я. 2016-йисалай адан эцигунар давамарзава. Эцигунар кьве девирда кьиле физва. 2018-йисуз чи пландик санлай вад зал — гимнастикадин, дзюдодин, азаддиз кьуршахар кьунин, боксдин ва къугъунрин жуьрейрай, ишлемишиз вахкун ква. Планда къейднавайвал, 2019-йисуз спортдин цин жуьрейрай чIехи зал эцигна куьтягьда. Алай вахтунда чна гьакIни республикадин пуд районда футболдин чIехи майданар туькIуьрунин кIвалахар тухузва”.
Ноябрдин эхирра машгьур спортсмен Али Алиеван 80 йисан юбилейдиз талукь яз кьиле фидай мярекатрикай сад министрди чпин идарадин вилик адаз гуьмбет ачухун жедайди къейдна. Ам 2011-йисуз Швейцарияда кьуршахар кьунай вири дуьньядин федерациядин резиденциядин вилик эцигнавай хьтинди жеда.
ГТО-дин комплексриз талукь яз М.Мегьамедова гьелелиг авай нетижаяр кьуна.
— Къейд ийин, исятда спортдал датIана 1 млн дагъустанви машгъул жезва. Им республикадин вири агьалийрин 34 процент я. И карда важиблу чка ГТО-дин комплексар уьмуьрдиз куьчуьрмишунини кьазва. Ийизвай чалишмишвилерин нетижада Дагъустан Республика и комплекс еримишунай сифтегьан 20-дан арада ава. Чна республикадин вири агьалияр ГТО-дал желбунихъ камар къачузва.
2017-йисан 1-январдин делилралди, РД-дин 41 муниципалитетда ГТО ВФСК-дин тестированидин 43 центр арадал гъанва. Мад ирид центр шегьердин ва районрин ДОСААФ РОСТО-дин патав кардик ква. ГТО-дин истемишунар кьилиз акъудун патал абур вири герек тадаракралди таъминарнава, — алава хъувуна ада.
Мегьамед Мегьмедова журналистар Дагъустандин спортдин баркаллувилин музей туькIуьрдай чкайрихъ галазни танишарна. Ам къведай йисан сифте кьилерай ачухдайвал я.
Дагъви Шериф
