Алатай гьафтеда Сулейман-Стальский райондин Зизика хуьруьн югъ къейдзавай мярекатдал райондин кьилин везифаяр тамамарзавайди тир Лацис Оружева КIварчагъа эцигзавай еке спорткомплекс мукьвал вахтара ишлемишиз вахкудайдакай хабар ганай. Чкадал фена килигайла, гьакъикъатдани, спорткомплексдал кIвалахар акьалтIарнава, куьлуь-шуьлуь кIвалахар хъийизма…
И объектдикай чна виликдайни кхьенай, спортдин рекье дередин 4 хуьр патални еке метлеб авай и дарамат ишлемишиз вахкунал виридан вил ала… ИкI, 5 агъзурдалай виниз инсанар яшамиш жезвай КIварчагъ дередин 4 хуьруькай (Зизик, КIварчагъ, НуьцIуьгъ ва Экен) гьич са хуьрени, я гьич са школадани лазим тир дережада къулай шартIар авай спортзал авач. 2006-йисуз КIварчагърин юкьван школадин дараматни спортзал галачиз ишлемишиз вахкана, амайбурукай, алатай асирда эцигнавай школайрикай, чун ерли рахазвач.
Малум хьайивал, и йикъара райондин кьил Нариман Абдулмуталибов спорткомплекс эцигнавай чкадал нубатдин сеферда фена, кьилиз акъуднавай кIвалахрихъ галаз таниш хьана. Райондин кьилин буйругъдалди эцигнавай объект кьабулун патал комиссия тешкилнава.
РикIел хкин: и спорткомплекс лезги халкьдин мерд хва, общественно-политический деятель, “Шарвили” мергьяматлувилин фондунин председатель Имам Яралиева мергьяматлувилин къанунралди эцигна. Спортдин имаратда жуьреба-жуьре секцийри кIвалахда. Яшариз килиг тавуна, ана спортдал рикI алай вирибуруз, гьа гьисабдай яз къунши хуьрерай тир ксаризни чпин устадвал хкаждай мумкинвал жеда, гьатта зайиф къекъвезвай инсанризни иниз къведай ва ина чпин рикI аладардай ва сагъламвал мягькемардай шартIар тешкилда. Са гафуналди, спорткомплексдин ракIарар вири патал гьамиша ачух жеда.
— Спорткомплексди ва патарив гвай чкайри санлай 5 гектардилай виниз тешкилзава. Анагни аваданламишда, ам КIварчагъ дередин вири агьалийрин культурадин халис центрадиз элкъведа, — къейдна вичин рахунра Нариман Абдулмуталибова.
Малум хьайивал, зурба майдандал экIя хьанвай и объект алай аямдин вири истемишунриз жаваб гудайди ва къенин юкъуз малум тир виридалайни хъсан технологияр ишлемишуналди, алай вахтунда кардик квай эцигунрин къайдайрал амална, эцигнава. Эцигунрин проектдинни сметадин къимет 45 миллион манатдилай виниз я. Ана алай аямдин вири тадаракар ва лазим алатар жеда. Ана еке спортзал, кьуршахар кьадай ва боксдин (санлай 400 квадратный метр) залар, кьилдин ксар патал тарсар тухудай тренажёррин зал, гьакIни куьмекчи блокдикай (тренерар патал ва парталар дегишардай чкаяр (раздевалкаяр), душевояр, спорткомплексдин администрациядин кабинетар ва икI мад) жеда. Са гафуналди, спортсменриз экуь ва ачух залра чпин устадвал хкаждай мумкинвал яратмишда.
Спортдин комплексдилай гъейри, ина футбол къугъвадай чIурни, чукурунардай рекьер, спортдин къугъунрин жуьреяр патал майдан, спортдин снарядар авай чка, парк ва аялар патал къугъвадай чка жеда.
Чун КIварчагъиз объектдал фейи чIавуз ана устIарри къенепатан кIвалахар тамамарзавай, кьилди къачуртIа, газопровод чIугуна куьтягьнавай, целди таъминарунин месэлаяр гъиле кьунвай. Райондин кьиле авай ксарин гафарай малум хьайивал, объект алай йисан зулуз ишлемишиз вахкун пландик ква. Зулухъай инаг къацу кул-кусар ва тарар цана туькIуьрдайвал я. Дараматдин вилик еке автостоянкани кардик кутада.
КIварчагъ дереда спорт вилик тухунин карда кьилин фикир боксдиз гуда, гьикI хьи, спортдин и жуьре дередин жаванрин ва жегьилрин рикI алайди ва виридалайни машгьурди я. КIварчагъ дередин спортсменрин агалкьунрикай газетда мукьвал-мукьвал хабарар гузва.
Эцигунриз тамашиз фейи чIавуз анал рахай КIварчагъа боксдай кардик квай секциядин тренер Альберт Межидова дередин агьалийрин тIварунихъай еке савкьатдай Имам Яралиеваз чухсагъул малумарна.
— Чна, КIварчагъ дередин спортсменри, инлай кьулухъ мадни бегьерлудаказ гьунарар къалурун патал зегьметар чIугвада, чак кутунвай умудар кьилиз акъудда,-лагьана А.Межидова.-Имам Яралиеван куьмекдалди кIварчагъвийрин кIвалера хъвадай яд хьана, алай йисуз и четин месэла арадай акъудун патал ада са миллион манат пул чара авуна. Чи дередин гзаф спортсменриз ада пулдин куьмекар гуни ва абурун агалкьунар къиметлу пишкешралди къейд авуни спортсменрин руьгь мадни хкажзава, абуруз мадни еке кукIушриз хкаж жедай шартIар тешкилзава.