Россиядин Дагъустан Республикада авай МЧС-дин Кьилин Управленидин Махачкъалада авай гуьзчивалдай ва вилик пад кьунин кIвалахрин отделди (Россиядин МЧС-дин РД-да авай ГУ-дин ОНД ва ПР) рикIел хкизва, чимивал гудай вахт (сезон) башламишунихъ галаз алакъалу яз чимивал гудай пичер ва маса алатар (установкаяр) авай яшайишдин кIвалерани квартирайра цIаяр кьунин жигьетдай хатасузвал таъминардай истемишунрал амал авунал фикир желбзава.
Гьар йисуз Россияда цIаяр кьунин гзаф дуьшуьшар арадал къвезва, гьайиф хьи, абурун нетижада инсанар телеф жезва. ИкI, тежрибади къалурзавайвал, Махачкъалада чимивал гудай вахт алукьайла, цIаяр кьунин дуьшуьшарни садлагьана артух жезва. Гзаф вахтара чIуру нетижайрал гъизвай дуьшуьшар инсанри мекьивилер башламишайвалди электрикдин куьмекдалди чимивал гудай, чебни бегьем устадвал авачиз туькIуьрнавай (кустарный) алатрикай менфят къачунихъ, абур ишлемишдайла, цIаяр кьунин хатасузвилин истемишунрал амал тавунихъ галаз алакъалу я. Идалайни гъейри, пичерин гурмагъар вахт-вахтунда михьзавач, абур ремонтзавач.
ЦIаяр кьунин 70 % дуьшуьшар хсуси кIвалер авай чкайра кьиле физва. Россиядин МЧС-дин РД-да авай ГУ-дин Махачкъалада авай ОНД-дин ва ПР-дин къуллугъчийри винидихъ тIвар кьунвай чкайра цIаяр кьунин вилик пад кьуниз талукьарнавай серенжемрал артух фикир желбзаватIани, тамамдаказ и кардин вилик пад кьаз жезвач. Чимивал гудай вахт алукьдалди вилик гьар са гражданинди, организацийрин руководителри сифте нубатда вичин кIвале, кIвалахзавай чкада цIаяр кьунин хатасузвилин гьакъиндай къайгъу чIугун герек я. И кар патал цIаяр кьунин хатасузвилин истемишунрал кIевидаказ амална кIанда ва мукъаятвилин маса серенжемарни рикIелай ракъурна виже къведач. Мисал яз, чпин кIвалах дуьздаказ къайдадик квачир чимивал гудай пичерикай ва маса приборрикай менфят къачуна кIандач. Пичер ва чимивал гудай амай приборар ишлемишиз башламишдалди вилик абур ахтармишун, лазим яз хьайитIа абур ремонт авун ва къайдадиз хкун герек тирдал амална кIанда. Общежитийрин, административный, общественный ва карханайрин куьмекчи дараматра, яшайишдин кIвалера заводра гьазурнавай вахтуналди тир ракьун ва маса приборар ва системаяр эцигдайла, и жуьредин продукция гьазурнавай карханайрин инструкцийрал, гьакIни чимивал гудай системайрин проектированидин тIалабунрал амал авун герек я.
Россиядин МЧС-дин РД-да авай ГУ-дин Махачкъалада авай ОНД-ди ва ПР-ди рикIел хкизва: винидихъ къалурнавай къайдайрал амал тавуни бедбахтвилерал гъида. Абур тIимил авач, амма кьилинбур рикIел хуьз четин туш. Мадни рикIел хуьх: цIай хкадардалди, цIаяр кьунин вилик пад кьаз регьят я.
Пешекарри мадни къейдзавайвал, эхиримжи йисара газдин приборар ишлемишунихъ галаз алакъалу яз хъиткьин хьайи дуьшуьшар гзаф жезва. Меркезда чимивал гудай вахт алукьнамазди арадал атай са шумуд дуьшуьшдини и кардин патахъай шагьидвалзава. ИкI, Махачкъалада, “Домостроитель” СО-да, Юбилейный куьчеда авай кьве мертебадин яшайишдин кIвалера газ хъиткьинунин нетижада 1982-йисуз дидедиз хьайи жегьил дишегьлиди ва адан руша (2005-йис) чанар гана. КIвал михьиз чкIана. Чкадал атай “Россиядин МЧС-дин РД-да авай отряд” ПСЧ-8 ФГКУ-ди хъиткьинун себеб яз арадал атай цIай кьун хкадарна. РФ-дин УК-дин 109-статьядин 3-паюна ва 208-статьядин 2-паюна къалурнавай тахсиркарвилерин лишанрин бинедаллаз силис тухун патал хабар Махачкъаладин Ленинский райондин СУ-диз агакьарнава.
Мад са мисал, Махачкъалада, Научный городок куьчеда авай 6-кIвале, 47-квартирада газ хкудунин нетижада арадал атай хъиткьинуникди кухня михьиз кана, идалди кIвалин иесидиз бегьем зарар гана.
Винидихъ къалурнавай дуьшуьшар арадал къведачир эгер газдикай менфят къачузвай ксари хатасузвал хуьнин къайдайрал амал авунайтIа, гьакIни авай и четин месэладикай газдин къуллугъар кьилиз акъудзавай майишатдиз вахтунда хабар ганайтIа.
Чна вири меркезвийриз гьакI вири дагъустанвийриз, газдин тадаракрикай менфят къачудайла, еке мукъаятвал хуьниз эвер гузва. Са гьихьтин ятIани шак физвай чIавуз телефондин “04” ва “112” нумрайриз зенгна хабар гун тIалабзава.
«Лезги Газет»
