И йикъара Дагъустандиз Кеферпатан Кавказдин федеральный округда Россиядин Федерациядин Президентдин патай тамам ихтиярар ганвай векилдин Аппаратдин РД-дин крарай федеральный кьилин инспектор Василий Колесников атана. КIвалахдин рекьяй мугьманвилин сергьятра аваз ам гьакIни Мегьарамдхуьруьн райондизни фена, хабар гузва райондин пресс-къуллугъди.
Ина Василий Колесникова, Мегьарамдхуьруьн райондин кьил Фарид Агьмедовни галаз, муниципалитетдин яшайиш патал важиблу объектар ахтармишна. ИкI, сифтени-сифте абур Ярагъ-Къазмайрин хуьре цIийи школа эцигзавай чкадал фена, эцигунрин кIвалахар кьиле физвай къайда ахтармишна. Лагьана кIанда хьи, ина кIвалахар худда кьиле физва. Пудратдин карханади ина са кьадар кIвалахар авунва, сад лагьай мертебадин цларни хкажнава. РикIел хкин, школа федеральный программадин сергьятра аваз эцигзава ва алай йисан декабрдалди ам ишлемишиз вахкун лазим я.
Райондин кьили мугьмандиз райондин мад са шумуд хуьруьн школадин дараматар чIуру гьалда авайдакай лагьана. Ярагъ-Къазмайрин школади пуд сменада кIвалахзава. Ам и татугай гьал арадай акъудунихъ галаз алакъалу яз туькIуьрнавай федеральный программадай эцигзава. Гьа и программадик Оружба хуьруьн школани акатзава, ина аялри кIелун патал виже текъведай са шумуд куьгьне дараматда, дуьз лагьайтIа, конторрин куьгьне кIвалера чирвилер къачузва. Василий Колесниковаз и объектни вичин вилералди акуна. Самур хуьруьн школадин дарамат ремонтдай ва я цIийикIа туькIуьр хъийиз жедай гьалда авач.
Райондин кьили лагьай маса месэла райондин рекьер чIуру гьалда хьунихъ галаз алакъалуди я. Делегацияди чIуру гьалда авай рекьер ахтармишна. Къейдна кIанда, КьепIир-Къазмайринни Кчунрин хуьруьн арада авай рекьин 6 километрдилай яргъи участок татугай гьалда ава.
Тагьирхуьруьн-Къазмайрин рехъни фикир тагана амукьнач. Гьуьлел фин патал къвезвай мугьманар ва туристар гьа и рекьяй физва, гьаниз килигна, ам чIуру гьалда хьуни туристар желб авунин кIвалах хейлин зайифарзава.
Райондин къурулушдин мад са важиблу месэла Ярукьваларилай Дербентдиз физвай рекьихъ галаз алакъалуди я. РикIел хкин, идалай вилик Фарид Агьмедова Ярукьваларин муьгъ туькIуьрунин карда куьмек гун патал Дагъустандин рекьерин майишатдин руководителдиз чарни кхьенай. Муьгъ эцигна куьтягьнава. Аламайди и чка аваданламишунин кIвалах я. Мегьарамдхуьруьн райондин агъада авай хуьрерин агьалийри, Ярукьваларин хуьряй финалди, рехъ кьвед-пуд сеферда куьруь ийизва, ида лагьайтIа райондин бюджетдизни хъсан патахъай таъсирда.
Василий Колесникова и месэлаяр федеральный дережада гьялун патал вири куьмекар гун хиве кьуна.
