Дагъларин уьлкведин меркездин 160 йис тамам жезва. Шегьердин администрацияди и югъ лайихлудаказ къейд авун патал йисан сифтедилай талукь серенжемар кьабулиз гатIунна.
Жуьреба-жуьре къуллугърин хиве кьилиз акъуддай крар туна. Шегьер аваданламишунин хейлин кIвалахар гъиле кьуна. Мисал яз, Россиядин Федерациядин Президентдин “Хатасуз ва ерилу рекьер” проектдин бинедаллаз 68 куьче ремонт ийиз эгечIна. Абурукай 40 куьче къайдада тунва. И кIвалахар авуниз федеральный бюджетдай 637,5 миллион манат пул ахъайнава.
Шегьердин са шумуд магьледа скверар, аллеяяр туькIуьрнава, и кар мадни давамарзава. Шамилан куьчеда къе-пака “Россия-зи тарих” музей — тарихдин парк ачухда. Алай вахтунда адан вилик квай гьаятар къайдадиз гъизва.
Махачкъала шегьердин администрациядин кьилин заместитель Запир Алхасова къейд авурвал, 16-сентябрдиз юбилейдиз гьазурвал акунин сергьятра аваз вишералди инсанри иштирак авур субботник кьиле тухвана. Гьа и юкъуз “Ак-гель” паркуна балугъчийрин кьвед лагьай фестивални тешкилнавай. Шегьерэгьлийри республикадин балугъчивилин карханайри, майишатри гъанвай жуьреба-жуьре балугъар маса къачуна, устад ашпазри балугърикай гьазурнавай няметрикай дад акуна, балугъар кьазвайбурун конкурсдиз килигна ва геждалди давам хьайи концертдихъ яб акална.
Чаз малум хьайивал, Махачкъаладин 160 йисан юбилейдин мярекатар 22-сентябрдиз башламишда. Йикъан сятдин 4-далай гуьгъуьниз шегьердин паркара, скверра жегьил несилди концертар тешкилда. Меркездин вузра ва сузра кIелзавайбуру чпин алакьунар къалурда.
23-сентябрдиз Расул Гьамзатован тIварунихъ галай проспект Дагъустандин 14 халкьдин милли майданри кьада. Кьибледихъай ва Кефердихъай атай векилри шегьерэгьлийриз Дагъларин уьлкведин халкьарин милли культурадиз, искусстводиз, сеняткарвилиз талукь серенжемар къалурда. Нянин сятдин 4-даз Урусрин драмтеатрдин вилик “Цамаури” международный фестивал кьиле фида.
Гьелбетда, юбилейдин кар алай мярекатар 24-сентябрдиз тешкилда. Меркездин майдандилай сятдин 11-даз велосипедистар Буйнакск шегьердиз рекье гьатда. Шегьердин пляждал къумадикай скульптураяр ийидайбурун ва спортдин фестивалар кьиле фида.
И юкъуз шегьердин 160 йисан юбилейдиз бахшнавай аллеядин бинеяр кутада. Махачкъаладин тарихдин музейда (адан 10 йисан юбилейни къейдда) “Шегьердин тарих”, П.Гьамзатовадин тIварунихъ галай изобразительный искусствойрин музейда “Махачкъаладин живопись” выставкайри кIвалахда. Сятдин 2-даз Дагъустандин госфилармониядин гатун майдандал “Махачкъаладин жаван гъетер” лишандик кваз республикадин искусствойрин аялрин школайрин тербиячийри еке концерт гуда.
Гьа и юкъуз Россиядин тIвар-ван авай спортсменрин иштираквални аваз авиа-шоу ва экстрим-шоу тешкилда. Тарки-Тау дагъдин кьилел Махачкъала шегьердин зурба пайдах хкажда.
Юбилейдиз талукьарнавай зурба концерт нянин сятдин 6-даз меркездин кьилин майдандал кьиле фида. Ана Дагъустандин ва Россиядин тIвар-ван авай манидарри, эстрададин гъетери, яратмишдай коллективри иштиракда.
Шегьердин юбилей агьалийрин ва мугьманрин фикир желбдайди жеда ва хуш авай виридавай ана иштиракиз жеда.
Хийир Эмиров
