Махачкъалада лезги шииратдин межлис кьиле фена

Къе, 22-майдиз, Дагъларин уьлкведин меркезда, Шииратдин театрда «Дагъустандин халкьарин театрдин, музыкадин ва шииратдин культурайрин гьафтеяр» проектдин сергьятра аваз, РД-дин писателрин Союздин лезги секциядин заседание ва лезги шииратдин межли кьиле фена.

Саки пуд сятда давам хьайи мярекатдиз алимар, общественный деятелар, студентарни школьникар, журналистар, милли эдебиятдал, медениятдал рикI алай хейлин ватанэгьлияр атанвай. Абурун жергейра профессор Гьажи Гашаров, Дагъустандин халкьдин писатель Абдуселим Исмаилов, Дагъустандин халкьдин шаир Арбен Къардаш, филологиядин илимрин доктор Гьаким Къурбан, «Лезги газетдин» векилар, профессор Шайдабег Мирзоев, РФ-дин искусствойрин лайихлу деятель Мегьамед Гьуьсейнов ва масабур авай.

Абдуселим Исмаилова гуьруьш ачухдайла къейд авурвал, алай вахтунда лезги писателрин секциядин вилик акъвазнавай кьилин месэлайрикай сад цIи бажарагълу шаир Кьуьчхуьр Саидан юбилей вини дережадаваз кьиле тухун я. И кардин патахъай алай вахтунда талукь ксарихъ галаз рахунар кьиле физва. Дагъустандин халкьдин писателди гьакIни чи девирда къелемдин устадрал гьалтзавай четинвилерикай, алай аямдин лезги эдебиятдикай суьгьбетарна.

Профессор Гьажи Гашарова лезги эдебиятдин тарихдиз гегьенш сиягьат авуналди, кIватI хьанвайбурун рикIел чи халкьдин шииратдихъ къадим тарих авайди хкана. Алимди гафарай малум хьайивал, виликдай литературадиз бажарагълу шаиррин тамам къифлеяр къведай. Эхиримжи йисара лагьайтIа, алакьунар авай жегьилар шаиррин сан лап тIимил я. Гьажи Гашарова мярекатдиз атанвай жегьилриз хайи чIал, культура мадни дериндай чируниз, милли изданийрихъ галаз алакъаяр хуьниз эвер гана.

Шииратдин межлисдин сергьятра аваз веревирдзавай месэлайрин патахъай гзафбуру чпин фикирар лагьана. Арбен Къардаша, Зульфикъар Къафланова, Мердали Жалилова, Наби Панагьова, Мегьамед Ибрагьимова, Айдин Балабекова, Владик Батманова ва масабуру чпин шиирар кIелна. Махачкъаладин 38-нумрадин гимназиядин, 28-нумрадин мектебдин школьникри, ДГУ-дин, ДГПУ-дин студентри лезги шаиррин эсерар кIелуналди, мярекат генани итижлу авуна.

РикIел хкин, Шииратдин театрда 25-майдиз Лезгийрин СтIал Сулейманан тIварунихъ галай госмуздрамтеатрди «Айисат» тамаша къалурда. Билетар театрдин кассадай маса къачуз жеда. Идалай гъейри, 26-майдиз гьа ина РД-дин композиторрин Союздин векилрин иштиракчивал аваз, лезги музыкадинни шииратдин межлисни кьиле фида.

Дагъустандин халкьдин шаир Арбен Къардаш

Зульфикъар Къафланов
Мердали Жалилов

Наби Панагьов
Шайдабег Мирзоев
Агьмедхан Сражидинов

[KGVID]https://lezgigazet.ru/wp-content/uploads/2017/05/20170522_184734.mp4[/KGVID]
Къурушви шаир Наби Панагьова шиир кIелзава

«Лезги газет»