Мукьвара «Лезги газетдин» кьилин редактор Мегьамед Ибрагьимов ва адан заместитель, «Къурушрин сес» газетдин кьилин редактор Муса Агьмедов Кьиблепатан Дагъустанда «Лезги газет» подписка авунин гьалар йигинарун патал Ахцегь, Мегьарамдхуьруьруьн, Сулейман-Стальский ва Кьурагь районриз мугьман хьана.

Ахцегь районда Мегьамед Ибрагьимов райондин кьил Осман Абдулкеримовахъ, администрациядин активдихъ галаз гуьруьш хьана. Вичин рахунра «Лезги газетдин» кьилин редакторди виридаз «Лезги газет» кхьиниз, хайи чIал ва адетар хуьниз, милли газетдихъ галаз алакъаяр хуьниз эвер гана.

— «Лезги газет» халкьдин ва гьукумдин векилрин арадавай арачи я. Газетдин кьилин везифайрикай сад халкьдихъ авай месэлаяр гьукумдин векилрал, гьукумди халкьдиз ийизвай къулайвилер жемятдал агакьарун я. Гьавиляй за квез, Ахцегь райондин играми агьалияр, квехъ авай месэлаярни гваз «Лезги газетдин» трибунадихъ эвер гузва. «Лезги газет» куьне куь месэлаяр раиж авун патал майдан я. Ша чна а майдандикай хийир патал менфят къачун, — лагьана М.Ибрагьимова.

Райондин активдихъ галаз кьиле фейи совещанидин сергьятра аваз Ахцегь райондин кьил Осман Абдулкеримова «Лезги газетдин» Ахцегь районда авай хсуси мухбир, «ЦIийи дуьнья» газетдин кьилин редактор, лезги чIал хуьник ва еримлу авуник лайихлу пай кутазвай Дашдемир Шерифалиевав райондин администрациядин патай Гьуьрметдин грамота вахкана. Лагьана кIанда, Д.Шерифалиев райондин газетдин кьилин редактордин везифайрив эгечIайдалай кьулухъ газетдиз акъатзавай макъалайрин ери, дережа хъсан хьанва. И карди милли публицистикада хейлин йисара бегьерлудаказ зегьмет чIугвазвай автордин пешекарвилин гьакъиндай шагьидвалзава.

P.S.

Ахцегь районда 2017-йисан 1-паюна «Лезги газет» 1253 касди кхьенвай.

«Лезги газет»