Алай йисан июндин вацра жемиятдин “Россиядин халкьарин Ассамблея” тешкилатдин 20 йис тамам хьуниз талукьарнавай мярекат кьиле фида. И вакъиадихъ галаз алакъалу яз июлдин вацра Россиядин халкьарин Конгрессни тешкилда.
“Россиядин халкьарин Ассамблея” тешкилатдин 20 йис тамам хьунин сергьятра аваз, са жерге мярекатар чи республикадани кьиле фида. И тешкилатдин Дагъустанда авай отделениди милли чIаларал акъатзавай газетрин редакцийрихъ галаз санал 5-11-классра кIелзавай аялрин арада “Хванахвавал — чи халкьарин садвилин бине” темадай виридалайни хъсан сочинение кхьинай конкурс малумарнава. Ам алай йисан январдилай апрелдалди давам жеда ва нетижаяр майдин эхирра кьада. Гъалибчийриз “Россиядин халкьарин Ассамблея” тешкилатдин патай гьуьрметдин грамотаяр ва къиметлу пишкешар гун фикирдиз къачунва.
Конкурсдиз ракъурзавай материалар (сочинение) хайи чIалал кхьизва ва абур басма авунвай кьуд чарчелай артух хьун лазим туш. Сочиненийрин кьилел “Конкурсдиз” кхьин шартI я.
“Лезги газетдин” редакцияди лезги мектебра кIелзавай аялриз и конкурсда иштиракуниз эвер гузва. Сочиненияр чи газетдин редакциядин адресдиз рекье тур.
«Лезги газет»
