Лезги чIалал рахух!

Дидед чIал… Зун патал ам вири чIаларилай вилик ква. Гьар садаз хайи чIалан къадир жен, ам гьамиша гегьеншариз, виликди тухуз алахъин.

Заз гзафни-гзаф чи шегьерра яшамиш жезвай жегьил хизанрикай рахаз кIанзава. Абур, эсиллагь лезги чIалакай са фикирни тавуна, чпин балайриз маса чIалар чириз алахъзава. Хайи чIалан гъавурда твазвач, кIвале урус, я тахьай­тIа, маса чIаларал рахазва.

Чеб лезгияр яз, жегьил гадаяр, рушар куьчедал дуьшуьш хьайила, урус чIалалди рахаз эгечIда. Гьелбетда, маса чIаларни чирун герек я. Амма дидед чIал кьулухъ туна, масад вилик кутун?.. Зун Азербайжан патаз гзаф сеферра фена. Ана чи лезги хуьрер гзаф ава, чеб лезгияр яз, ана яшамиш жезвай чи багърияр азербайжан чIалал рахазва. Им бес лезги тарих квадарун лагьай чIал тушни?

Лезги чIал бязибуруз бегенмиш туш, чеб гафарин гъавурда четиндиз акьазва лугьузва. Амма гзаф гафар, хайи чIалал рахун тавурла, рикIелай алатзава.

Аялриз хайи чIал чируниз кье­тIен фикир гун лазим я. “Аял — кье­пIи­­на­маз, дана — епинамаз” лугьузва­ халкь­дин мисалда. Гьавиляй акьалтзавай несилар гъвечIизамаз руьгьдин ивирриз мукьва авуна кIанда.

Вердихан Къулиев, Вини Къуруш