«Леки» клубдин — 10 йис

18-сентябрдиз Мегьарамдхуьре “Леки” стадиондал гьа ихьтин тIвар алай футболдин клубдин 10 йисан юбилейдиз талукьарнавай мярекат кьиле фена.

Ана Мегьарамдхуьруьн райондин кьил Фарид Агьмедова, райондин администрациядин аппаратдин къуллугъчийри, футболдин клубдин кьиле авайбуру, райондин спортшколайрин коллективри, тренерри, спортсменри, райондин агьалийри иштиракна­.

Райондин кьили футболдин “Леки” клуб тешкилай Рафик Агъамирзоеван тIварцIихъ разивилин кьетIен келимаяр лагьана. Муниципалитетда спорт вилик тухуник еке пай кутунай ва кьетIен лайихлувилерай Фарид Агьмедова клуб тешкилайди тир Рафик Агъамирзоеваз, командадин тренер Кямран Нурагьмедоваз ва къугъунрай тафаватлу хьайи Ибрагьим Мирзамегьамедоваз, Нуруддин Аллагьвердиеваз ва Арсен Сулеймановаз гьуьрметдин грамотаяр гана.

Футболдин “Леки” клуб 2007-йисуз тешкилайди я. Ам футболдай вад сеферда Да­­гъустандин чемпион, Россиядин Кубок къазанмишун патал 2016-йисан акъажунрин­ Кьиблепатан зонадин  (ЮФО-СКФО) гъалибчи, 2015-йисуз Дагъустандин Кубок патал кьиле фейи акъажунрин гъалибчи, 2015-йисан Россиядин чемпионатдин зонадин (ЮФО-СКФО) 3-дивизиондин гимишдин призер я.

«Лезги газет»